Turqia do të përdorë fuqitë e saj mbi detet turke sipas Konventës së Montreux të vitit 1936 për të parandaluar përshkallëzimin e mëtejshëm në Ukrainë, tha të hënën presidenti turk Rexhep Tajip Erdogan.
Sipas Konventës së Montreux, Turqia mund të parandalojë anijet luftarake të huaja që të kalojnë nëpër detin turk gjatë luftës.
“Turqia ka përmbushur me rigorozitet përgjegjësitë e saj brenda institucioneve dhe aleancave në të cilat është e përfshirë, veçanërisht Kombet e Bashkuara, NATO dhe Bashkimi Evropian,” shtoi Erdogan pas një takimi të kabinetit në kryeqytetin Ankara, ku ai e quajti të papranueshëm sulmin rus ndaj Ukrainës.
Erdogan theksoi gjithashtu nevojën për dialog midis Rusisë dhe Ukrainës.
“Nuk është kurrë vonë për të negociuar me qëllime të mira dhe për të bërë përparim në të gjitha çështjet në mënyrë paqësore”, shtoi presidenti turk.
Ai vuri në dukje se Turqia ka bërë përpjekje të konsiderueshme për të ndihmuar në zgjidhjen e luftës në Ukrainë.
“Në këtë proces, ne kemi vijuar iniciativat tona të gjera diplomatike për të vendosur paqen dhe stabilitetin”, tha Erdogan, duke shtuar:
“Natyrisht, ne nuk do të komprometojmë interesat tona kombëtare, por nuk do të neglizhojmë as ekuilibrin rajonal dhe global”.
Erdogan theksoi se autoritetet turke deri më tani kanë evakuuar pesë mijë shtetas të tyre nga Ukraina në Turqi dhe vende të tjera.
“Ne po vazhdojmë të evakuojmë sipas nevojës”. /tesheshi.com/
