Presidenti turk Rexhep Tajip Erdogan priti homologun kosovar Hashim Thaçi në Pallatin Vahdet në Stamboll dhe fotot nga takimi u postuan në Twitter.
“Falënderoj Presidentin Erdogan për pritjen e ngrohtë dhe bisedën produktive për të gjitha çështjet në lidhje me të dy vendet, lidhjet dypalëshe, çështjet rajonale dhe globale. Dy kombet tona gëzojnë lidhje miqësore dhe ne do të forcojmë partneritetet në të ardhmen,”shkroi Thaçi në Twitter, por nuk u zbuluan detaje të tjera nga takimi.
Dy javë më parë, autoritetet turke reaguan ndaj vendimit të Kosovës për të patur një ambasadë në Jeruzalem, si pjesë e një marrëveshjeje për normalizimin e marrëdhënieve ekonomike midis Serbisë dhe Kosovës, të nënshkruar në Uashington.
Me atë marrëveshje, Kosova mori përsipër të hapte një ambasadë në Jeruzalem, dhe Izraeli në këmbim mori përsipër ta njohë Kosovën.
Ministria e Jashtme turke ka shprehur “zhgënjim të plotë” për një vendim të tillë nga Kosova.
Deklarata tha se ishte zhgënjyese që Kosova po konsideronte një veprim të tillë, një shkelje të rëndë të ligjit ndërkombëtar dhe një rezolutë të Kombeve të Bashkuara.
Duke kujtuar se Turqia ishte ndër vendet e para që njohu pavarësinë e Kosovës dhe mbështeti njohjen e Kosovës në skenën ndërkombëtare, një deklaratë nga Ankara tha se Turqia beson se Kosova nuk duhet të hapë një ambasadë në Jeruzalem, duke theksuar se kjo do të ishte shkelje e ligjit ndërkombëtar dhe vuajtje shtesë për popullin palestinez vendi i të cilit është i okupuar.
“Ne u bëjmë thirrje udhëheqësve të Kosovës të respektojnë këto vendime dhe të shmangin një hap që minon statusin ligjor dhe historik të Jeruzalemit dhe mund të jetë një pengesë në të ardhmen për njohjen e Kosovës nga vendet e tjera”, tha deklarata.
Jeruzalemi Lindor konsiderohet nga palestinezët të jetë kryeqyteti i shtetit të tyre të ardhshëm të pavarur, gjë që Izraeli e mohon.
Serbia gjithashtu është zotuar nga marrëveshja e Uashingtonit për të zhvendosur ambasadën në Jeruzalem, megjithëse asnjë vend evropian nuk e ka bërë më parë. Bashkimi Evropian mbron krijimin e dy shteteve, Izraelit dhe Palestinës, me Jeruzalemin Lindor si kryeqytetin e Palestinës.
Ndërkohë, vihet re një detaj diferencues mes takimit Erdogan-Rama dhe Erdogan-Thaçi. Me të parin, kryeministrin shqiptar, lideri turk nuk ka mbajtur as maskë e as distancë sociale, duke e trajtuar si mik edhe familjar, pasi me Ramën ka zhvlerësuar dhe protokollet zyrtare. Rama ishte familjarisht në rezidencën e Erdoganit në Marmaris. Ndërsa në rastin e Thaçit, takimi ka qenë zyrtar dhe nën masa COVID. /tesheshi.com/
