Presidenti turk Rexhep Tajip Erdogan pati një tjetër bisedë telefonike me homologun rus Vladimir Putinin, natyrshëm mbi zhvillimet e fundit në Ukrainë, duke përfshirë bisedimet e planifikuara të paqes që do të mbahen në Turqi javën e ardhshme.
Sipas një deklarate, presidenti turk dhe ai rus iu referuan gjendjes së fundit të luftës dhe negociatave për përfundimin e saj. Të dy ranë dakord të zhvillonin bisedime në Stamboll, sipas njoftimit.
Gjatë komunikimit, Erdogan theksoi nevojën për të arritur një armëpushim dhe paqe midis Rusisë dhe Ukrainës sa më shpejt të jetë e mundur dhe për të përmirësuar situatën humanitare në rajon. Ai madje theksoi se Turqia do të vazhdojë të kontribuojë në çdo mënyrë në këtë proces.
Më herët, zëdhënësi i presidentit turk, Ibrahim Kalin, i tha Al Jazeera-s se Turqia mbështet unitetin dhe sovranitetin kombëtar të Ukrainës.
Kalin i tha TV Katarit se lufta në Ukrainë nuk ishte e justifikuar, por se kanalet e komunikimit me Rusinë duhet të mbeten të hapura.
“Turqia po përpiqet t’i japë fund luftës në Ukrainë përmes dialogut me Moskën dhe Kievin,” tha ai.
Siç dihet, delegacionet e Rusisë dhe Ukrainës do të takohen të hënën në Turqi për një raund të ri negociatash ballë për ballë, njoftoi sot David Arakhamia, një nga negociatorët ukrainas.
“Gjatë bisedimeve të sotme, përmes telekonferencës, u vendos që raundi tjetër të mbahet ballë për ballë, në Turqi, nga data 28 deri më 30 mars”, ka shkruar ai në një postim në Facebook. Megjithatë, presidenca turke nuk ka specifikuar datën e saktë të takimeve.
Kryenegociatori rus, Vladimir Medinsky, ka njoftuar gjithashtu se një raund i ri bisedimesh do të mbahet të martën dhe të mërkurën, pa saktësuar vendndodhjen.
Një raund bisedimesh private mes Rusisë dhe Ukrainës u mbajt më 10 mars, në Turqi, në Antalia, mes ministrave të jashtëm, por pa arritur rezultate të prekshme.
Që atëherë, bisedimet kanë vazhduar përmes video-konferencës dhe janë konsideruar “të vështira” nga të dy kampet. /tesheshi.com/
