Presidenti turk, Rexhep Tajip Erdoan dhe ai rus Vladimir Putin zhvilluan një bisedë telefonike të mërkurën për të diskutuar situatën e tmerrshme humanitare në Halep.
Burime presidenciale thanë se të dy udhëheqësit ranë dakord se duhet të zbatohet një ndërprerje e plotë e armiqësive sa më shpejt të jetë e mundur, pas sulmeve nga ana e forcave të regjimit të Asadit dhe militantëve shiitë të mbështetur nga Irani në qytetin e Halepit, pavarësisht marrëveshjes së pjesshme për armëpushim që ishte arritur dje.
Të dy liderët gjithashtu theksuan se komuniteti ndërkombëtar duhet të punojë së bashku për të siguruar një evakuim të civilëve dhe të opozitës nga Halepi lindor.
Duke nënvizuar rëndësinë e “korridoreve humanitare” për evakuim, Erdogan i tha Putinit se Turqia është e gatshme për të ndërmarrë të gjitha masat e nevojshme për të siguruar ndihmën humanitare dhe strehim të përkohshëm të personave të zhvendosur nga Halepi.
Zëvendëskryeministri turk, Şimşek njoftoi të martën se së shpejti do të ngrinin një qytet me tenda për të akomoduar deri në 80.000 refugjatë sirianë që pritet të largohen nga Halepi lindor së shpejti.
Të martën vonë u raportua për një evakuim të zonave të rrethuara të opozitës, por marrëveshja nuk shkoi sipas planit të mërkurën, pasi Irani, një nga mbështetësit kryesore të Bashar Asadit, kishte imponuar kushte të reja, duke thënë se ai dëshironte që forcat rebele të lejojnë evakuimin e njëkohshëm të dy fshatrave.
Një armëpushim që kishte përkuar me lajmet për planin e evakuimit u ndërprenë dhe luftimet shpërthyen përsëri në Halep të mërkurën. /tesheshi.com/
