Presidenti Erdogan zhvilloi një bisedë telefonike me homologun e tij rus Vladimir Putin mbi operacionin ushtarak turk në veriperëndim të Sirisë, menjëherë pasi diskutoi lidhur me të njejtën temë edhe me Presidentin francez Emmanuel Macron, njoftojnë agjencitë.
Nga Zyra e Presidentit të Turqisë është njoftuar se të dy presidentët diskutuan zhvillimet më të fundit në Siri dhe Operacionin “Dega e Ullirit” në Afrin.
Erdogan theksoi se qëllimi i operacionit është pastrimi i rajonit Afrin nga organizata të tilla si Njësia e Mbrojtjes Popullore (YPG) dhe Shteti Islamik i Irakut dhe Levant (ISIL), raporton Anadolia.
Ai shtoi se një nga qëllimet kryesore është mbrojtja e sigurisë kombëtare të Turqisë, duke vënë në dukje se operacioni ka për qëllim që të japë një kontribut të rëndësishëm në drejtim të unitetit politik dhe integritetit territorial të Sirisë.
Ai theksoi se Turqia i kushton rëndësi të madhe bashkëpunimit me Rusinë lidhur me çështjen e Sirisë. Të dy udhëheqësit diskutuan gjithashtu marrëdhëniet midis Turqisë dhe Rusisë.
Ata shprehën vendosmërinë e tyre për të vazhduar përpjekjet e tyre të përbashkëta për të arritur një zgjidhje politike për Sirinë në Kongresin Kombëtar të Dialogut Sirian, i cili do të mbahet në Soçin të Rusisë në fund të janarit.
Në të njëjtën kohë, një zyrtar i lartë i administratës amerikane, në kushte anonimiteti tha se Presidenti i SHBA Donald Trump së shpejti do të zhvillojë një bisedë telefonike me Erdogan për të shprehur shqetësim lidhur me ofensivën turke kundër forcave kurde në Sirinë veriperëndimore, raporton Reuters.
I njëjti zyrtar tha se zyrtarët turq kishin dërguar “sinjale konflikti” në shkallën e ofensivës kundër Njësisë Mbrojtëse Popullore të Kurdëve, të cilët gëzojnë mbështetjen e SHBA-së në rajonin sirian të Afrin.
“Duhet të shohim se si po zhvillohet situata në terren. Por mesazhi ynë është unik. Ne do t’i ftojmë ata për të kufizuar sulmet aq sa të jetë e mundur dhe ne do ta vlerësojmë këtë”, tha zyrtari i SHBA.
Një tjetër zyrtar zyrtar i administratës amerikane, poashtu në kushte anonimiteti, tha se Trump po planifikon të bisedojë me Erdoganin këtë të mërkurë. /tesheshi.com/
