Presidenti turk, Recep Tayyip Erdoğan, që gjendet për një vizitë pesëditore në SHBA, është takuar sot me zëvendëspresidentin amerikan, Joe Biden, me të cilin ka shkëmbyer mendime mbi situatën posaçërisht në Siri.
Zëdhënësi i presidentit turk, Ibrahim Kalın, ka thënë pas takimit se Turqia dhe SHBA-të janë në një mendje se nuk mund të ketë shtet kurd në veri të Sirisë.
Mes dy personaliteteve është rënë dakort gjithashtu se është e nevojshme t’u pritet rruga të gjitha burimeve financiare për DAESH-in.
Në takimin që zgjati 30 minuta është gjetur gjuha e përbashkët dhe për shkëmbimin e informacioneve në lidhje me situatën në Lindjen e Mesme.
Ndërkaq, në axhendë për Erdoğan-in është dhe takimi me presidentin Obama, që do të zhvillohet pas një darke në Shtëpinë e Bardhë.
Pikëpamjet e kundërta mes dy aleatëve në lidhje me kurdët e PYD-së dhe YPG-së që luftojnë në Siri, bashkuar me një sërë pakënaqësish të tjera të pretenduara, u hapën udhë zërave për një mungesë dëshire të Obama-s për ta takuar Erdoğan-in gjatë vizitës në SHBA, diçka që ka rezultuar e pavërtetë. /tesheshi.com/
