Presidenti turk është kthyer nga një vizitë në Afrikë, për të mos vonuar të reagojë ndaj rezolutës së parlamentit gjerman që i cilëson “gjenocid” ngjarjet e 1915-ës.
Çështja armene po shfrytëzohet për të shantazhuar Turqinë, ka deklaruar Rexhep Tajjip Erdogan.
“E di thellë në zemër se çështja kryesore nuk janë armenët. Ata thjesht po manipulohen. Çështja armene është thjesht shantazh ndaj Turqisë anekënd botës.”
“Dua që bota ta dijë,” ka nënvizuar presidenti turk, “i pëlqen apo jo, ne kurrë nuk do ta pranojmë akuzën për gjenocid.”
Ai u ka bërë thirrje politikanëve gjermanë që t’i hapin së bashku arkivat për t’i dhënë zgjidhje vdekjes së armenëve në 1915-ën, madje u ka kërkuar atyre t’i hapin dhe arkivat gjermane. Por ata nuk e ndërmarrin këtë hap, do të thoshte kryeshtetari i Turqisë, sepse e dinë se do të bëhen me turp.
Erdogani nuk e ka kursyer dhe kancelaren gjermane, Angela Merkel. “Do të bëj çfarë të kem në dorë,” ka pretenduar ai t’i ketë thënë Merkel tre apo katër ditë para kalimit të rezolutës në parlamentin gjerman. “Të bësh çfarë ke në dorë paska nënkuptuar mospjesëmarrjen në votim në parlament?!”, ka pyetur retorikisht dhe me ironi Erdogani.
“E theksoj edhe një herë. Nuk kemi asgjë në të shkuarën tonë për t’u turpëruar. Por ato vende që shpesh e akuzojnë Turqinë për gjenocidin armen kanë gjakun e miliona viktimave të pafajshme.”
“Çfarë ne duam është që Turqia të trajtohet ndershmërisht, e të mos përdoren standarde e norma të dyfishta,” ka kërkuar ai.
Erdogani e pati pohuar dhe gjatë vizitës në Kenia se qëndrimi i disa segmenteve në Gjermani kundër Turqisë ishte i papranueshëm. Sipas tij, ato po kryenin operacione kundër Turqisë, e se media gjermane ishte aktive në këtë pikëpamje.
Rezoluta e parlamentit gjerman i ka trazuar më tej ujërat e marrëdhënieve gjermano-turke, asnjëherë të qeta, pavarësisht asaj çka duket në sipërfaqe. /tesheshi.com/
