Rrëzimi i avionit rus ka vijuar të mbetet tema kryesore në Turqi edhe në një pritje në pallatin presidencial me rastin e Ditës së Mësuesit.
Në fjalën e mbajtur nga mikpritësi, presidenti i vendit, është theksuar e drejta e Turqisë për t’i mbrojtur kufijtë e vet. “Çdokush duhet të respektojë të drejtën e Turqisë për t’i mbrojtur kufijtë e saj.”
Erdogani ka bërë dhe një përshkrim të incidentit, duke vënë në dukje pamundësinë e forcave turke për të vepruar ndryshe, “Ne rrëzuam pas dhjetë paralajmërimeve një prej dy avionëve luftarakë me nacionalitet të panjohur që shkelën hapësirën tonë. Arsyeja që nuk kanë ngjarë incidente më të rënda në të shkuarën në lidhje me Sirinë është gjakftohtësia e Turqisë. Askush nuk duhet të dyshojë se ne bëmë përpjekjet më të mëdha për ta shmangur incidentin më të fundit.”
Ashtu si në ditët e mëhershme, kur zyrtarët më të lartë turq kanë shprehur shqetësimin për bombardimin e turkmenëve, dhe Erdogani nuk e ka anashkaluar këtë fakt. “Ne i dënojmë fuqimisht sulmet e përqendruara në vendet ku jetojnë turkmenët. Ne kemi të afërm që jetojnë atje.”
Ai vuri në dukje se në rajonin ku jetonin turkmenët, në Bajërbuxhak, e ku ka patur bombardime e ofensivë tokësore, nuk kishte prani të ISIS-it. “Regjimi i Esadit dhe vendet që e mbështesin atë kanë kryer sulme të reja, në kundërshtim me frymën e Vienës.”
Turkmenët janë një grup etnik turkik, dhe ata i gjen në Siri e Irak. Bashkësia e tyre ka patur gjithmonë një marrëdhënie të vështirë me regjimin e Esadit dhe të atit të tij. Turqia tregon një vëmendje të veçantë për këtë popullsi, e ka pritur më tepër se 1.500 prej tyre vetëm këtë fundjavë. /tesheshi.com/
