Presidenti turk Rexhep Tajip Erdogan tha gjatë një bisede telefonike me presidentin amerikan Joe Biden të enjten se ishte koha për të hequr të gjitha sanksionet “të padrejta” ndaj industrisë turke të mbrojtjes.
Sipas një deklarate nga Zyra e Presidentit turk, Erdogan i tha gjithashtu Bidenit se Turqia pret që kërkesat e saj për blerjen e 40 avionëve të rinj luftarakë F-16 dhe modernizimin e flotës ekzistuese të zgjidhen sa më shpejt të jetë e mundur.
Ankaraja porositi më shumë se 100 avionë F-35 Lockheed Martin, por Shtetet e Bashkuara e hoqën Turqinë nga programi në vitin 2019, pasi bleu sistemin antiraketë S-400 nga Rusia.
Turqia e quajti vendimin të padrejtë dhe kërkoi një rimbursim prej 1.4 miliardë dollarësh.
Reuters raportoi vitin e kaluar se Ankaraja i kishte dërguar një kërkesë Uashingtonit për të blerë 40 avionë F-16 në prodhimin e Lockheed Martin dhe gati 80 komplete për të modernizuar avionët luftarakë ekzistues.
Në dhjetor 2020, Uashingtoni vendosi sanksione ndaj presidentit të Drejtorisë së Industrisë Ushtarake të Turqisë, Ismail Demir, dhe tre zyrtarëve të tjerë për blerjen e sistemit S-400.
Partneriteti dhjetëvjeçar i aleatëve të NATO-s ka kaluar nëpër stuhi të paprecedentë në vitet e fundit për shkak të mosmarrëveshjeve në politikën ndaj Sirisë, lidhjeve më të ngushta të Ankarasë me Moskën, pretendimeve për erozion të të drejtave të njeriut në Turqi, etj. Uashingtoni e ka paralajmëruar vazhdimisht Turqinë që të mos blejë më armë nga Rusia.
Ankaraja ka thënë se synon të përfundojë blerjen e një serie të dytë të S-400 nga Rusia, gjë që mund të përkeqësojë marrëdhëniet me Shtetet e Bashkuara.
Kërkesa për avionë luftarakë ka të ngjarë të jetë e vështirë për t’u miratuar nga Kongresi amerikan, i cili ka mbajtur një qëndrim shumë më të ashpër ndaj Turqisë në vitet e fundit.
Kongresmenët demokratë dhe republikanë i bënë thirrje administratës Biden në tetor që të mos i shesë Turqisë avionë luftarakë F-16, duke thënë se ata ishin të bindur se Kongresi do të bllokonte çdo eksport të tillë.
Nga ana tjetër, në kuadër të takimit në Antalias mes Rusisë dhe Ukrainës në nivel ministrash të Jashtëm, nga Shtëpia e Bardhë u tha se “Presidenti Biden shprehu vlerësimin për përpjekjet e Turqisë për të mbështetur një zgjidhje diplomatike të konfliktit, si dhe për angazhimet e fundit të Turqisë me liderët rajonalë që ndihmojnë në promovimin e paqes dhe stabilitetit”. /tesheshi.com/
