Presidenti turk Rexhep Tajip Erdogan ka thënë se vendi, për sa kohë që ai është në krye të tij, nuk do të lejojë vendet që “mbështesin terrorizmin” të bëhen anëtarë të NATO-s.
Duke folur me gazetarët në kthimin e tij nga Azerbajxhani, Erdogan tha se negociatat midis Turqisë, Suedisë dhe Finlandës nuk ishin në nivelin e dëshiruar. Këto janë negociatat që delegacionet e tre vendeve zhvilluan në Ankara lidhur me kërkesën e dy vendeve nordike për anëtarësim në NATO.
“Fatkeqësisht, bisedimet e delegacionit tonë me Finlandën dhe Suedinë nuk ishin në nivelin e dëshiruar”, theksoi Erdogan.
Duke theksuar se Suedia dhe Finlanda kanë pritshmëri të mëdha nga bisedimet, Erdogan tha se këto dy vende nuk kishin ndërmarrë hapat e nevojshëm në lidhje me kërkesat turke, duke shtuar se “terroristët po ecin edhe tani në rrugët e Stokholmit”, me mbrojtjen e policisë.
“Ne nuk mund të përsërisim gabimet e bëra në të kaluarën në pranimin e vendeve që pranojnë dhe ushqejnë terroristë të tillë brenda NATO-s, e cila është një organizatë sigurie”, tha Erdogan.
Suedia dhe Finlanda aplikuan zyrtarisht për t’u anëtarësuar në NATO më 18 maj, një vendim i nxitur nga lufta e Rusisë kundër Ukrainës, e cila filloi më 24 shkurt. Turqia, një anëtare e vjetër e aleancës, ka kundërshtuar kandidaturat e tyre për anëtarësim, duke kritikuar ato vende për tolerimin dhe madje mbështetjen e “grupeve terroriste”.
Presidenti turk Erdogan njoftoi se do të kishte biseda telefonike me homologët rusë dhe ukrainas Vladimir Putin dhe Vladimir Zelensky në ditët në vijim dhe tha se Turqia do të vazhdojë të inkurajojë të dyja palët që të mbajnë kanalet e dialogut dhe diplomacisë për të ndërtuar paqen në Ukrainë. /tesheshi.com/
