Kurdët zinin një pozicion qendror në deklaratat e bëra nga Rexhep Tajip Erdogan së bashku me presidentin e përkohshëm të Sirisë, Ahmed al-Sharaa, pas takimit të tyre në Ankara, i cili zgjati afërsisht tre orë e gjysmë.
“Ne diskutuam hapat që duhen ndërmarrë kundër organizatës terroriste separatiste në verilindje të Sirisë dhe mbështetësve të saj,” tha presidenti turk, duke iu referuar milicisë kurde YPG. Erdogan theksoi gatishmërinë e Turqisë për t’i dhënë Sirisë mbështetjen e nevojshme në këtë drejtim, duke shprehur kënaqësinë e tij “për vullnetin e fortë të vëllait Sharaa në luftën kundër terrorizmit”.
Turqia ka kërcënuar prej muajsh me një operacion ushtarak në veri të Sirisë, duke kërkuar heqjen e autonomisë kurde, shpërbërjen e Forcave Demokratike Siriane, trupi kryesor i të cilave janë forcat kurde YPG, dhe integrimin e tyre në ushtrinë e ardhshme siriane, me një tërheqje paralele nga Siria e udhëheqjes së tyre. Ankaraja pretendon se YPG është e lidhur me organizatën kurde PKK, të cilën e akuzon për sulme terroriste kundër Turqisë.
Presidenti turk mbrojti integritetin territorial të Sirisë, heqjen e sanksioneve ndërkombëtare dhe deklaroi gatishmërinë për të ofruar mbështetjen e nevojshme për rindërtimin e vendit dhe që zëri i tij të dëgjohet në arenën diplomatike.
“I kushtojmë rëndësi konsolidimit të vullnetit të vendit me një qasje gjithëpërfshirëse. Ne jemi të gatshëm të ofrojmë mbështetjen e nevojshme për rindërtim, si dhe ndihmën humanitare. Ndërsa zhvillimi ekonomik i Sirisë përshpejtohet, kthimet vullnetare (të refugjatëve sirianë nga Turqia) gjithashtu do të fitojnë vrull. Një seri sanksionesh kundër Sirisë janë pengesë për rimëkëmbjen e vendit”, theksoi ndër të tjera Erdogan.
Ai më pas deklaroi: “Përpjekjet tona për të hequr sanksionet kundër regjimit të përmbysur kanë çuar në një relaksim të pjesshëm. Ne do të vazhdojmë nismat tona derisa të kemi rezultate të plota. Po bëjmë gjithçka që zëri i qeverisë së re të dëgjohet në fushën e diplomacisë. Shumë ministra dhe zyrtarë nga Turqia kanë vizituar Damaskun dhe do të vazhdojnë ta bëjnë këtë.”
“Si Turqi, ne nuk i lamë vetëm vëllezërit tanë sirianë në ditët e tyre më të vështira, ne do t’u japim mbështetjen e nevojshme në periudhën e re”, premtoi gjithashtu Erdogan.
Në përfundim, ai tha se Turqia do të vazhdojë të zhvillojë marrëdhëniet e saj me Sirinë në shumë mënyra. “Ne po i promovojmë marrëdhëniet tona në të gjitha fushat nga tregtia, aviacioni civil, energjia, shëndetësia dhe arsimi. Nëse ka besim, ka mundësi. Jemi njerëz që besojmë dhe i dorëzohemi faktit se në çdo vështirësi ka lehtësi. Ne nuk kemi asnjë dyshim se në dashtë Zoti, vëllezërit tanë sirianë do ta rilindin vendin e tyre”, tha presidenti turk.
Nga ana e tij, Ahmed al-Sharaa theksoi se dëshiron t’i shndërrojë marrëdhëniet siriano-turke në një “partneritet të thellë strategjik”, ndaj falënderoi presidentin turk për mbështetjen e tij dhe e ftoi atë të vizitojë Sirinë.
“Ne duam të bashkëpunojmë në të gjitha fushat, humanitare, kulturore apo ekonomike dhe të promovojmë një strategji të madhe”. […] Dua të falënderoj edhe një herë z. Erdogan që i kushton rëndësi të madhe bashkëpunimit dhe veçanërisht përfundimit me sukses të kësaj periudhe tranzitore”, theksoi presidenti në tranzicion i Sirisë. /tesheshi.com/
