Në Shqipëri do zhvillohet një Europian futbolli. Ky lajm u dha në fillim nga kreu i FSHF-së Armando Duka e më pas nga kryeministri Rama.
“UEFA, na besoi organizimin e Kampionatit Europian për 17-vjeçarët në vitin 2025-të. Ky Kampionat Europian është padiskutim organizimi më i madh në historinë e futbollit tonë dhe duhet të jemi shumë krenar që pas organizimit të sukseshëm të shumë aktiviteteve europiane tani na u besua një kompeticion kaq prestigjoz”.
Pas tij ishte Rama që shkroi: “Pas finales së UEFA Conference League të vitit të kaluar, UEFA ka vendosur sot që Kampionati Europian për moshat U17, i vitit 2025 do të mbahet në Shqipëri në katër stadiume. Gjëra të paimagjinueshme deri disa vite më parë”, shkruan kryeministri Rama.
Kampionati do të mbahet në stadiumet “Air Albania”, “Loro Boriçi”, “Elbasan Arena” dhe “Egnatia Arena”.
Por duke mbetur sërish te futbolli, për Armando Dukën pati dy gëzime në një ditë. Veë Europianit të 17-vjeëarëve në Shqipëri, ai morri dhe postin e lartë në UEFA.
“Dua të ndaj me ju lajmin se nga sot më është besuar detyra e Zëvëndës Presidentit të UEFA-s. Ndihem shumë i nderuar nga ky besim që më ka dhënë komiteti i futbollit europian. Ky është padiskutim një privilegj i madh për mua por në të njëjtën kohë është dhe një vlerësim i madh që i bëhet futbollit shqiptar e punës së madhe që është bërë në këto vite.
Komuniteti i futbollit shqiptar sot ka një vend në drejtimin e futbollit europian dhe sëbashku do të japim kontributin tonë për mbarëvajtjen dhe strategjitë zhvillimore të futbollit në të gjithë Europën”. /tesheshi.com/
