Një xhami që strehon civilë është bombarduar në Mariupol, ku mijëra njerëz kanë qenë të rrethuar prej ditësh, tha sot Ministria e Jashtme e Ukrainës.
Sipas ukrainasve, brenda godinës ndodheshin 86 civilë me origjinë turke, si dhe 34 fëmijë.
“Xhamia e Sulltan Sulejmanit të Madhërishëm dhe gruas së tij Roxelana në Mariupol u bombardua nga pushtuesit rusë”, tha ministria në një mesazh në Twitter.
Deri më tani nuk është sqaruar se kur ka ndodhur bombardimi.
Një zëdhënëse e ambasadës, duke cituar informacione nga kryetari i qytetit, tha se ata ishin strehuar në xhami së bashku me të tjerët që kërkonin strehim nga sulmi rus në portin e rrethuar në Detin Azov.
“Ka probleme serioze komunikimi në Mariupol dhe nuk ka asnjë mundësi për t’iu afruar atyre”, shpjegoi ajo.
Qindra mijëra civilë janë bllokuar në Mariupol për më shumë se një javë pa ushqim, ujë, ngrohje apo energji elektrike mes të ftohtit. Përpjekjet për të vendosur një armëpushim kanë dështuar vazhdimisht.
Zyrtarët turq nuk iu përgjigjën kërkesave për koment. Ministri i Jashtëm Mevlut Çavusholu tha të premten se Turqia kishte tërhequr rreth 14,000 qytetarë të saj nga Ukraina.
Të paktën 1,582 civilë janë vrarë në Mariupol, në Ukrainën juglindore, si rezultat i bombardimeve ruse dhe një rrethimi 12-ditor të qytetit, njoftoi sot këshilli i qytetit, duke e postuar atë në internet.
“Nuk do ta harrojmë dhe nuk do ta falim kurrë këtë krim kundër njerëzimit”, theksoi komuna.
“Mariupol kujton … Grozny dhe Aleppo”
Më herët, nënkryetari i bashkisë së Mariupolit, Sergei Orloff foli për rrjetin gjerman ARD, duke theksuar se “objektet e konsiderueshme të furnizimit janë shkatërruar dhe të gjitha përpjekjet për evakuimin e popullatës civile përmes korridoreve të sigurta deri më tani kanë dështuar”.
Orloff është i zemëruar me forcat ruse, të cilat, thotë ai, po bllokojnë qëllimisht evakuimin e civilëve. “Qyteti është nën zjarr dhe bombardim të vazhdueshëm me rrugët përreth qytetit duke u dëmtuar rëndë. Kamionët e ndihmave humanitare, për shembull, nuk mund të arrijnë në qytet, ashtu siç nuk mund të dorëzohen furnizimet mjekësore”.
Sipas vlerësimeve të nënkryetarit të bashkisë së Mariupolit, rreth 200 mijë qytetarë po tentojnë të largohen nga qyteti në orët e fundit.
“Nuk di si ta përshkruaj shkatërrimin që ka pësuar qyteti ynë. Mariupol në fakt nuk ekziston më. Skena të kujton Groznin dhe Aleppon,” tha Orloff. “Ushtria ukrainase është shumë e guximshme, por me rusët që hedhin bomba, ajo nuk ka armë për të mbrojtur jetën e civilëve.” /tesheshi.com/
