Nga Mensur Krasniqi
Gjatë ditës së nesërme në Shkup pritet të mbërrin kryeprokurorja e Rumanisë, apo e njohur si gruaja e hekurt, Laura Codruta Kovesi. Nën organizim të një debati nga USAID mbi temë për luftën e korrupsionit në nivele të larta shtetërore, ajo do të përcjellë përvojën e saj edhe tek Prokuroria Speciale.Në këtë debat do të merr pjesë edhe ambasadori amerikan Jess Baily.
Ndryshe, Condruta është prokurorja e fortë që goditi krimet dhe aktet korruptive në Rumani, duke qenë një protagoniste e vlerësuar nga qendrat botërore. 42-vjeçarja vetëm në vitin 2015 ka ngritur 1250 akuza për korrupsion ndaj zyrtarëve më të lartë shtetëror, ndërsa deri tani mbi 80 ministra, zv/ministra, drejtor dhe funksionarë të tjerë shtetëror kanë përfunduar në burg për krime institucionale dhe korrupsion. Ajo vitin e kaluar ngriti akuzë edhe kundër ish-kryeministrit Adrian Nastase, por edhe kryeministrit në detyrë Victor Ponta, duke kërkuar ngrirjen e pasurisë së tij.
Duke njohur profesionalizmin e saj dhe mbështetjen që gëzon nga komuniteti ndërkombëtar, tani në opinionin e gjërë në Maqedoni kanë filluar dilemat, në mos vallë e njëjta do e ndihmon Prokuroren speciale Katica Janeva që së bashku të arrestojnë edhe funksionarët e lartë shtetëror në Maqedoni, ku shumica e tyre në bazë të përgjimeve nga bombat e liderit të LSDM-së Zoran Zaev, kanë dëshmuar se janë zhytur thellë në korrupsion dhe keqpërdorim të detyrës zyrtare.
Sipas ekspertit juridik Osman Kadriu, ardhja e kryeprokurores së Rumanisë në Maqedoni është e mirëseardhur për Prokuroren Speciale, Katica Janeva, duke mos përjashtuar këtu ndonjë bashkëpunim eventual në aspektin e përgatitjes dhe procesuimit të lëndëve.
“Çdo ndihmesë çdo logjistikë edhe nga jashtë, sidomos të institucioneve të kësaj lëmie është e mirëseardhur. Andaj edhe kryeprokurorja e Rumanisë shpresoj se do të ketë ndonjë ndikim për pregatitjen dhe procesuimin e lëndëve nga aspekti praktik që zhvillohet në shtetet tjera, gjegjësisht në atë të Rumanisë. Por problemi qëndron diku tjetër meqë në Maqedoni është formuar Prokuroria Speciale, ndërsa ende nuk kemi Gjykatë Speciale. E shikoj me shumë pesimizëm që Prokuroria Speciale ti përgjigjet kompetencës së saj, duke marrë parasysh se ajo kompetencën e ka të qartë, mirëpo epilogun e fundit nuk e cakton Prokuroria Speciale por Gjykatat e politizuara të shtetit. Ja kemi rastet e para kur Prokuroria Speciale kërkoi paraburgim për disa persona që kanë kryer vepra penale kundër zgjedhjeve, ndërsa Gjykata rrefuzoi kërkesën e Prokurorisë”, deklaroi për portalin tesheshi.com, eksperti juridik, Osman Kadriu.
