Mohammad Younes Menfi u zgjodh president i Këshillit të Përkohshëm Presidencial të Libisë të premten dhe Abdul Hamid Mohammed Dbeibah si kryeministër në Këshillin e Presidencës.
Menfi dhe Dbebibah, të cilët u zgjodhën si pjesë e forumit pesë-ditor Libian për dialogun politik, do ta çojnë vendin në zgjedhjet kombëtare të planifikuara për 24 dhjetor.
Forumi përfshiu Libianë me prejardhje të ndryshme politike, që përfaqësojnë tre rajonet kryesore të vendit: Tripolitania në perëndim, Barca në lindje dhe Fezzan në jug.
Franca, Gjermania, Italia, Britania dhe Shtetet e Bashkuara e mirëpritën marrëveshjen për të formuar një Këshill të Përkohshëm Presidencial të Libisë, duke paralajmëruar se ishte “ende një rrugë e gjatë” për paqen përfundimtare.
“Ekzekutivi i vetëm do të duhet të zbatojë marrëveshjen e armëpushimit, të sigurojë shërbime themelore publike për popullin libian, të nisë një program të rëndësishëm pajtimi, të adresojë nevojat e përgjithshme të buxhetit dhe të organizojë zgjedhje të përgjithshme”, thanë fuqitë perëndimore në një deklaratë të përbashkët.
Turqia, Emiratet e Bashkuara Arabe dhe Egjipti gjithashtu mirëpritën zgjedhjen e Këshillit të Përkohshëm Presidencial të Libisë. Sot, Presidenti turk Rexhep Tajip Erdogan përgëzoi udhëheqësit e qeverisë së përkohshme të Libisë për zgjedhjet.
“Turqia do të vazhdojë përpjekjet e saj për të ruajtur unitetin politik, integritetin territorial, stabilitetin, paqen, sigurinë dhe prosperitetin në Libi dhe forcimin e bashkëpunimit me atë vend në periudhën e ardhshme,” tha Erdogan.
Që nga rrëzimi i Muhammar Geddafit në të ashtuquajturën “Pranverë Arabe”, e cila u shoqërua nga pasoja tragjike, Libia është shndërruar në “tokë të djegur”. /tesheshi.com/
