Ministri i Jashtëm i Kuvajtit Sheik Ahmed Nasser Al-Muhammad Al-Sabah tha sot se është rënë dakord për hapjen e kufijve ajrorë, tokësorë dhe detarë midis Arabisë Saudite dhe Katarit, duke filluar nga mbrëmja e sotme.
Sheikh Al-Sabah shtoi se Emiri i Kuvajtit kishte bërë dy ftesa me Emirin e Katarit, Sheik Tamim bin Hamad Al Thani dhe Princin e Kurorës saudite Muhamed bin Salman për të nënshkruar një deklaratë në samitin e Këshillit të Bashkëpunimit të Gjirit (GCC) që do të mbahet nesër në Arabinë Saudite. Ky është hapi i parë drejt zgjidhjes së kësaj krize të pakuptimtë.
Arabia Saudite, Emiratet e Bashkuara Arabe, Bahreini dhe Egjipti ndërprenë lidhjet me Katarin në qershor 2017, duke akuzuar vendin për financimin e grupeve “terroriste” dhe se ishte shumë afër Iranit.
Pas ndërprerjes së marrëdhënieve, katër shtete lëshuan një listë me 13 kërkesa kundër Katarit, përfshirë atë të mbylljes së Rrjetit të Medias Al Jazeera.
Katërshja, e udhëhequr nga sauditët, më pas detyroi shtetasit e Katarit që jetonin në këto vende që të largoheshin prej tyre, pasi mbyllën hapësirën ajrore për linjat ajrore të Katarit dhe bllokuan portet dhe kufijtë e saj.
Ndërkohë, bllokimi nuk dha efektet që mendohej. Katari nuk pranoi asnjë kusht dhe, duke u mbështetur te Turqia i rezistoi privimeve të shumta, diç pretendohet nga Doha, duke u fuqizuar akoma dhe më tepër, ekonomikisht, por sidomos ushtarakisht. /tesheshi.com/
