Të gjithë u tallën dhe nuk e morën serioz deklaratën e bërë nga Albin Kurti më 20 shtator të vitit të kaluar kur tha se “në 4-5 vitet e ardhshme ka gjasa të ketë përsëri luftë”.
Pas hiç më larg se katër muajsh nga ky paralajmërim, zërat për një luftë të re mes Kosovës dhe Serbisë janë shtuar dukshëm pas acarimit të situatës mes dy vendeve.
Deputet i Lëvizjes Vetëvendosje, ai vazhdon të mendojë se gjasat për një konflikt të ri mes shqiptarëve dhe serbëve janë shtuar dukshëm..
Në një intervistë për “Koha Jonë”, në Shqipëri, Kurti shprehet se sot në Beograd janë në pushtet të gjitha forcat politike që ishin në kohën e Sllobodan Milosheviçit, dhe sipas tij rritja e shpenzimeve ushtarake të Serbisë flet për mundësitë e një konflikti.
“Serbia është duke u militarizuar ndërkaq ndikimi rus është duke u shtuar. Buxheti vjetor i Serbisë për ushtrinë e saj është 500 milionë euro. Sivjet ajo ka ndarë edhe 300 milionë të tjera për armatim të ri dhe mirëmbajtje të tij. Bosnja, Kosova, por edhe Mali i Zi janë në rrezik nga Serbia. Kosova e Shqipëria duhet të bashkërendohen për fatin e mirë të kombit shqiptar”, shprehet Kurti.
Duke parë tensionimin e situatës, Kurti kërkon nga Shqipëria për çdo rast t’i dale në ndihmë Kosovës.
“Qeveria dhe shteti shqiptar duhet të mbledhë shqiptarët anembanë kufijve që na ndajnë padrejtësisht dhe njëkohësisht të fuqizojë aleancën rajonale me Zagrebin, Sarajevën dhe Sofjen. Kosova është tejet e rëndësishme për t’ia lënë atë vetëm qeverisë së Kosovës. Qeveria e Shqipërisë duhet ta ketë parasysh këtë”, thotë Kurti.
Kutojmë se Rama, pas ngjarjes së “trenit”, ka thënë se “serbët e Beogradit në Kosovë veç si turistë do vijnë një ditë po si zot të vendit s’vijnë dot më kurrën e kurrës”. /tesheshi.com/
