Në kulmin e një debati publik për luftën ndaj korrupsionit dhe dekriminalizimit, ka mbërritur kërkesa e parë zyrtare e organit të akuzës në gjykatë për të dënuar një zyrtar të shtetit shqiptar.
Bëhet fjalë për ish-kreun e komunës Rashbull të Durrësit, Hysen Gashin, për të cilin Prokuroria e Durrësit ka kërkuar 5 vjet burg për shpërdorim detyre.
Siç njofton organi i akuzës, Prokuroria e Durrësit kërkon dënimin me 5 vite burgim për ish-kryetarin e komunës Rrashbull, Durrës, Hysen Gashi, i akuzuar për veprën penale të “Shpërdorimit të detyrës” më shumë se një herë, gjatë procedurave të dhënies së lejeve të ndërtimit në zonën turistike të Shkëmbit të Kavajës.
Së bashku me ish-kryetarin e komunës, Prokuroria e Durrësit mori të pandehur në hetimin e kësaj çështje edhe 6 zyrtarë të tjerë lokalë, për të cilët tashmë ka përfunduar gjykimi.
Ndërkohë, gjykimi për të pandehurin Gashi vijoi i veçuar dhe, në përfundim, prokuroria kërkon që, krahas dënimit të tij me 5 vite burgim, t’i hiqet gjithashtu edhe e drejta për ushtrimin e funksioneve publike për 5 vite.
Ndërkaq, po sot Kontrolli i Lartë i Shtetit, në një njoftim të sajin bën të ditur se ka zbuluar një shkelje të madhe në kompaninë shtetërore të transmetimit të energjisë elektrike OST.
Sipas KLSH-së, dëmi i përgjithshëm i këtij dëmi shkon në 6 milionë euro dhe ka paditur në prokurori dy zyrtarë në rang drejtori. /tesheshi.com/
