Brexit në qershor, më pas Trump në nëntor dhe vitin e ardhshëm kërcënimi vjen nga Marine Le Pen, liderja e partisë euroskeptike franceze, Fronti Nacional. Populizmi rrallë ka qenë kaq popullor dhe institucionet demokratike perëndimore e ndërkombëtare duken kaq të brishta. Një vëzhgim i fundit në 25 vende, kryer nga Ipsos Mori, tregon pakënaqësinë e përhapur tek popullsia mbi të cilën lulëzojnë populistët.
Në Britaninë e Madhe dhe në Amerikë, 60 dhe 63 për qind të të anketuarve thonë se vendi i tyre është në rrugën e gabuar. Ndërsa në Francën përjetësisht të pakënaqur, shifra ka një rritje galopante prej 89 për qind.
Shkaqet që fshihen pas kësaj pakënaqësie të madhe variojnë nga vendi në vend. Papunësia është shqetësimi kryesor në Francë, por jo në Britani e Amerikë ku dominojnë emigracioni dhe terrorizmi.
Gjermanët, të cilët shkojnë në zgjedhje vitin e ardhshëm, grinden për varfërinë dhe pabarazinë. Ata që votojnë për partitë dhe politikanët populistë, shpesh, fokusohen tek një çështje e vetme në kurriz të problemeve të tjera.
Në Britani, votuesit e bardhë më pak të arsimuar që dyshohet se kanë votuar masivisht për t’u larguar nga Bashkimi Europian, mund të zbulojnë se ata do të vuajnë më shumë nga një anëtarësi e pjesshme sesa nga anëtarësia e plotë që kishin.
Të bindësh ata që nuk arrijnë të shohin përfitimet e një status-quoje mund të jetë punë e vështirë. Në Francë, proporcioni i njerëzve që shqetësohen për papunësinë është pesë herë më i lartë sesa niveli aktual i papunësisë. Në Britani, ankthi për emigrantët është më shumë se tre herë më i lartë sesa përqindja e popullsisë që janë emigrantë. T’u thuash votuesve se gjërat për të cilat ata shqetësohen nuk janë të mira, por jo aq të këqija sa ata mendojnë, nuk ka shumë gjasa të dëgjohet nga publik kaq skeptik.
Përgatiti: Juli Prifti – /tesheshi.com/
