Më shumë se 1 milion fëmijë të kequshqyer nën moshën pesë vjeç në Jemen, jetojnë në zona me nivele të larta të kolerës, thotë organizata “Save The Children” ndërsa ka nisur të dërgojë ekspertë shëndetësorë në zonat më të goditura të vendit.
Përshkallëzimi i ndihmës vjen ndërsa dolën të dhënat më të fundit se epidemia vdekjeprurëse e kolerës që nisi në prill 2015, ka infektuar më shumë se 425 mijë njerëz dhe ka shkaktuar vdekjen e 1900 të tjerëve.
“Save the Children” thotë se fëmijët nën moshën 15 vjeç tani llogariten se përbëjnë 44 për qind të rasteve të reja dhe 32 për qind të rasteve të vdekjes në Jemen ku një luftë shkatërrimtare civile dhe kolapsi ekonomik ka lënë me miliona njerëz në prag të vdekjes nga uria.
Shpërthimi i kolerës nxiti Kombet e Bashkuara, javën e kaluar, të rishikojnë vlerësimin e tyre humanitar dhe tani llogaritet që 20.7 milionë jemenitë kanë nevojë për ndihmë, nga një shifër e mëparshme prej 18.8 milionë njerëzish nga një popullsi 28-milionëshe.
Numri i të infektuarve mund të shkojë deri në 600 mijë njerëz siç thuhet në “shifrën më të madhe të regjistruar në një vend të vetëm ndonjëherë”, duke tejkaluar edhe epideminë në Haiti në vitin 2011. /tesheshi.com/
