Enver Hoxhaj, njeriu që do aspirojë të jetë ai kryeminstër i Kosovës në emër të PDK, tha në Tiranë se ishte i bindur në këtë.
“Unë jam mandatar nga Partia Demokratike e Kosovës që ta udëheq qeverinë e ardhshme të Kosovës dhe jam o sigurt që PDK-ja do ta udhëheqë qeverinë e ardhshme të Kosovës. Kam qenë gjatë në pozita të ndryshme në Kosovë.
Qëllimi im është që të kem një mendim të ri dhe plan të ri strategjik në raport me Shqipërinë, sa i takon bashkëpunimit politik, se nuk mund të sillemi me parametrat e 2008-s siç kalojmë 2020-ta dhe në këtë drejtim do të bëjmë përpjekje maksimale që të dalim me një platformë të qartë sa i takon bashkëpunimit në politikë”, tha Hoxhaj në një takim me kreun demokrat Basha.
Pas Vjosa Osmanit pak ditë më parë, është Hoxhaj që po realizon një vizitë në Tiranë.
Basha e vuri theksin te përballja e ish-krerëve të UÇK-së në Hagë, ku dhe është përfolur si i implikuar dikur, në rolin e përkthyesit të Gjykatës së Hagës, në mbledhjen e fakteve nga terreni për krime të mundshme nga shqiptarët.
“Kemi folur edhe për një sfidë konkrete që është ajo e përballjes me procesin në Gjykatën Speciale. Një proces i cili kurrsesi nuk mund të lejohet të kthehet në një gjykim ndaj Kosovës, ndaj Luftës Çlirimtare, ndaj drejtuesve dhe luftëtarëve të Ushtrisë Çlirimtare të Kosovës dhe për këtë kërkohet një bashkërendim u plotë dhe u gjithanshëm midis Shqipërisë dhe Kosovës dhe kur të gjithë forcat politike në Shqipëri dhe në Kosovë duhet t’i japin kontributin e tyre dhe të jenë të njëzëshëm në mbështetjen e luftës clirimtare të Kosovës në mbështetje të Ushtrisë Çlirimtare të Kosovës”, theksoi Basha. /tesheshi.com/
