Ministri i Punëve të Jashtme i Kosovës, Enver Hoxhaj, ka lëshuar alarmin se Vuk jeremiq as nuk duhet menduar të kandidojë për kreun e OKB-së.
“Si ministër i jashtëm i Serbisë ka lobuar proaktivisht kundër njohjes ndërkombëtare të Kosovës, ka kundërshtuar politikën amerikane dhe evropiane në Kosovë, përfshirë këtu edhe ndërhyrjen humanitare të NATO-së, si dhe ka kundërshtuar propozimin e emisar i OKB-së për zgjidhjen e statusit final të Kosovës.
Këto qëndrime destruktive të Jeremiqit e bëjnë atë kandidatin më të pavolitshëm të mundshëm për të çuar përpara doktrinën e përgjegjësisë për të mbrojtur (Responsibility to Protect) të OKB-së dhe zgjidhjen paqësore të konflikteve që kjo organizatë promovon”, u shpreh Hoxhaj.
Shefi i diplomacisë së Kosovës thekson se edhe vendi nga vjen Jeremiq nuk ka të drejtë morale të zgjidhet në poste kaq të larta.
“Serbia ka nxitur dhe udhëhequr shumicën e konflikteve të dhunshme në Ballkan dhe si i tillë, nuk përfaqëson rajonin dhe karakterin paqedashës që Sekretari i Përgjithshëm i OKB-së duhet të ketë”, deklaroi Hoxhaj për kallxo.com.
Në votimin që u mbajt të premten e kaluar, mbështetjen më të madhe për postin e sekretarit të përgjithshëm të OKB-së e mori ish kryeministri i Portugalisë, Antonio Guterres me 11 prej 15 vendeve anëtare ndërsa jeremiq si i dyti u mbështet nga tetë vende.
Në vendin e tretë doli Susana Malcorra e Argjentinës.
Pas dy raundeve të votimit duket se Shtetet e Bashkuara të Amerikës dhe Rusia, si anëtare të përhershme të Këshillit të Sigurimit, nuk janë afër një kompromisi për një kandidaturë kështu që procesi i përzgjedhjes së pasuesit të Ban Ki-moon mund të shkojë deri në tetor.
Nga kandidaturat tjera, ish Presidenti i Sllovenisë Danilo Turk ka humbur mbështetjen fillestare duke u radhitur në vendin e katërt ndërsa Irina Bokova e Bullgarisë në vendin e pestë.
Kroatja Vesna Pusiç qe tërhequr nga gara një ditë para se të mbahej votimi.
/tesheshi.com/
