Skënderbeu tashmë edhe zyrtarisht është pjesë e fazës së grupeve të Europa Ligës. Korçarët tashmë shohin më larg, duke synuar të arrijnë edhe ato të Ligës së Kampionëve pasi janë në turin e fundit që i dërgon ata në garën më prestigjioze të futbollit në botë. Flasin aktorët e kësaj fabule që do të shkruhet në historinë e futbollit shqiptar.
Arkitekti kryesor i kësaj skuadre është presidenti Ardian Takaj që ndjehet shumë i lumtur me suksesin e arritur, por objektivi tani ndryshon, ëndrra bëhet Champions-i.
“Është një punë 5-vjeçare dhe më vjen mirë që më në fund e arritëm një sukses të tillë. Kemi qënë pranë edhe në momente të tjera por tashmë jam i lumtur që arritëm deri këtu.
Natyrisht që si objektiv tani kemi grupet e Champions-it pasi edhe aty do të bëjmë lojën tonë duke provuar çdo shans. Salihin do e doja në ekip pasi është shumë i rëndësishëm për ne”, tha pas ndeshjes Takaj.
Protagonisti kryesor i këtij suksesi pa asnjë dyshim është sulmuesi Hamdi Salihi. Lojtari i përfaqësueses kombëtare ka realizuar tre gola për korçarët në këtë fazë dhe ishte lojtari kyç në skuadrën e drejtuar nga Mirel Josa.
“Jemi shumë të kënaqur. Ekipi ka treguar maturi deri në këtë fazë dhe jemi me këmbë në tokë. Futbolli shqiptar është duke kaluar një moment mjaft të mirë dhe kjo duhet të na gëzojë të gjithëve”, tha Salihi për mikrofonin e Super Sport.
Mirel Josa, trajner i skuadrës së Skënderbeut thotë se po e shijojnë ëndrrën e kahmotshme, ndërkohë preferon skocezët e Celtic për kundërshtarë të radhës në Champions.
“Duhet shumë kujdes në vazhdim të kësaj gare. Thjesht jemi duke festuar. Ëndrra u bë realitet, ishte ëndërr për të gjithë tifozët e Skënderbeut dhe shqiptarët. Nuk e di se cilët janë kundërshtarët. Dua të kem përballë Celticun në Champions League”, përfundoi Josa.
/tesheshi.com/
