Kampionati anglez do ende për të përfunduar, por që nga e premtja e ka tashmë fituesin. Çelsi e ka bërë të tijin trofeun për herë të gjashtë, për të pestën herë në epokën e Premier League-s.
Një barazim ndaj Suonsi Sitit në javët e para të sezonit, në shtatorin e 2016-s, një humbje në shtëpi ndaj Liverpulit dhe një tjetër, e thellë, në fushën e Arsenalit, thuajse e kishin bërë të pashpresë qëndrimin e Antonio Conte-s te Çelsi.
Dukej si një përsëritje e sezonit të shkuar, me zërat për largimin e teknikut italian që kishin nisur të gëlonin.
Muaj më vonë, shumë muaj më vonë, më 12 maj të 2017-s, Conte e sheh veten ngadhënjyes në futbollin anglez në të parin sezon të tij.
Çelsi ka fituar 0-1 në fushën e Uest Bromuiçit, e kur i duhen dy ndeshje të tjera për të luajtur, është shpallur kampion.
Premier League është kthyer në normalitetin e vet pas sezonit të shkuar, kur trofeun do ta fitonte një skuadër e tillë si Lestër Siti.
Antonio Conte bëhet i katërti teknik italian që prek suksesin në Premier League, pas Ancelotti-t, Mancini-t dhe Ranieri-t.
“Ëndërr e bërë realitet,” deklaron ai. “Është një arritje e madhe, sepse është kampionati më i vështirë në botë për t’u fituar. Dua t’u them faleminderit lojtarëve për angazhimin, për sjelljen dhe pasionin e tyre, për vullnetin për të bërë diçka të madhe këtë sezon. Ata luftuan për këtë, prandaj kjo fitore është për lojtarët.”
Në pritje për t’u fituar është dhe një tjetër trofe, ai i FA Cup-it. Më 27 maj luhet finalja ndaj Arsenalit. /tesheshi.com/
