Kryeministri i Maqedonisë së Veriut, Dimitar Kovaçevski, ka premtuar një shpërblim prej 500 mijë eurosh nëse përfaqësuesja e futbollit e këtij vendi arrin të kualifikohet për në Katar. Premtimi u dha në prag të përballjes finale me Portugalinë, të martën në Porto.
Ditë më parë, të enjten, Maqedonia e Veriut mposhti kampionin aktual të Evropës, Italinë me rezultat 1:0, dhe vetëm një fitore tjetër e ndan nga momenti historik i pjesëmarrjes në një Botëror. Oreksi është shtuar nga fitorja kundër Italisë, edhe pse përballë është Portugalia e Ronaldos. 
“Ju jeni kampionët, fituesit dhe krenaria e të gjithë neve. Ne besojmë në ju dhe për këtë ju uroj suksese në ndeshjen me Portugalinë. Më e pakta që mund të bëjmë ne si qeveri është që të ndajmë një shpërblim prej 500.000 euro nëse kualifikoheni në Kupën e Botës”, u tha Kovaçevski lojtarëve në avion.
Maqedonia Veriore morri pjesë vitin e kaluar për herë të parë në historinë e saj në një Europian, ndërsa në kualifikueset për Katarin, përveç Italisë, si mysafire mundi edhe Gjermaninë. /tesheshi.com/
