Nga Blendi Gashi
Zgjedhjet presidenciale që do të mbahen në Serbi më 2 prill, janë paralajmëruar se do të organizohen edhe në Kosovë, mirëpo, ende nuk ka një vendim nga institucionet nëse do të lejohet mbajtja e tyre apo jo.
Ditë më parë, Komisioni zgjedhor i Serbisë mori vendimin që në zgjedhjet për presidentin e Serbisë, të hapen 90 vende zgjedhore në, siç e kanë quajtur ata “territorin e Krahinës Autonome të Kosovës e Metohisë”, madje, kryeministri aktual i Serbisë, Aleksandar Vuçiq, i cili është pretendenti kryesor për t’i fituar këto zgjedhje, ka paralajmëruar se do të mbajë mitingje zgjedhore në vendin tonë.
Ja ç’thotë mazhoranca dhe opozita
Zv. ministri i Administrimit të Pushtetit Lokal, Bajram Gecaj, njëherësh këshilltar i kryeministrit Mustafa, ka konfirmuar për mediat, se një qëndrim për këtë çështje do ta marrin këtë javë.
“Qeveria ende nuk ka qëndrim mbi këto zgjedhje”, ka thënë Gecaj.
Në anën tjetër, deputetët të opozitës kanë kërkuar nga qeveria që të mos lejojë mbajtjen e zgjedhjeve presidenciale serbe.
Albulena Haxhiu, deputete e Vetëvedosje-s thotë se arsyetimi i mbajtjes së zgjedhjeve të Serbisë në Kosovë në emër të dyshtetësisë, është i pavërtetë dhe i paqenë.
Ajo thotë se shtetas serbë jetojnë edhe në Gjermani, Austri, Kroaci, Slloveni, etj, por Serbia nuk po hapë vendvotime në asnjërin nga këto shtete, ndërsa ka vendosur të hapë 90 vendvotime në Kosovë.
“Këtu po shmanget qëllimisht fakti i mosnjohjes së shtetësisë së Kosovës nga ana e Serbisë, si dhe shkelja flagrante e sovranitetit shtetëror dhe institucional të vendit.
Më shumë se sa t’i ketë votat e serbëve që jetojnë në Kosovë, Serbia me këto zgjedhje do ta rikonfirmojë praninë e saj në Kosovë, dhe njëkohësisht në praktikë ta jetësojë qëndrimin e saj se Kosova është pjesë e Serbisë. Prandaj, Qeveria dhe insitucionet tjera shtetërore duhet t’i ndalojnë dhe pamundësojnë këto zgjedhje, ngase nënshtrimi i tyre po e legjitimon praninë e Serbisë në Kosovë”, thotë deputetja Haxhiu për tesheshi. com.
Avni Arifi, nga Aleanca për Ardhmërinë e Kosovës beson se qeveri nuk do arrijë të ndalë mbajtjen e zgjedhjeve serbe në shtetin tonë.
“Nuk besoj që kjo qeveri do të bëj ndonjë përpjekje. Është e papranueshme që në Kosovë të bëhet fushatë pēr zgjedhjet e një shteti tjetër. Sa për këtë qeveri mbahen sigurtë”, ka thënë Arifi, për tesheshi. com.
Zv.kryeministri nga radhët e serbëve, Branimir Stojanoviq, ka deklaruar se nuk sheh arsye pse të mos mbahen zgjedhjet presidenciale serbe në Kosovë.
“Pres që zgjedhjet të mbahen edhe në Kosovë, përveç nëse dikush në Prishtinë nga ide të habitshme vetjake do të vendos ndryshe”, ka deklaruar ai për mediat.
Kujtojmë se në zgjedhjet e kaluara që ka mbajtur Serbia, qytetarëve serbë të Kosovës, iu ishte mundësuar nga OSBE-ja votimi në Kosovë, duke e quajtur grumbullim votash, e jo hapje e vendvotimeve, edhe pse në veri ishin hapur vendvotime. /tesheshi.com/
