Al Jazeera njofton se bisedimet e paqes për Sirinë që do duhet të nisin sot në Gjenevë janë ende në rrezik për shkak të një sërë problemeve, duke përfshirë kaosin me ftesat dhe mospërmbushjen e kushteve të vëna.
Sipas Al Jazeera-s, Këshilli i Lartë i Negociatave (HNC) i opozitës siriane po debaton ende nëse delegatët e tij do të marrin pjesë në bisedimet. Këshilli ka vënë një sërë kushtesh për pjesëmarrjen, mes të cilëve është ai për heqjen e rrethimeve, si edhe kushti për ndalimin e sulmeve ajrore.
“Ne dëshirojmë që bisedimet të nisin, por pengesa kryesore janë ata që vazhdojnë t’i bombardojnë civilët tanë dhe t’i vdesin urie,” i ka deklaruar Al Jazeera-s nga Riadi zëdhënësi i HNC-së, Salem el-Muslat.
HNC-ja ka lajmëruar më vonë se negociatorët e saj nuk do të jenë të premten në Gjenevë, për shkak se nuk është marrë asnjë përgjigje për kërkesat nga OKB-ja, duke shtuar gjithashtu dhe problemet logjistike.
Po ashtu nuk do të mund të marrin pjesë disa grupe të tjera opozitare, që ende nuk janë pajisur me viza për të udhëtuar drejt Zvicrës.
Vetë i dërguari i posaçëm i OKB-së për Sirinë, Staffan de Mistura, i është drejtuar dje popullit sirian me një videomesazh, ku ka thënë se bisedimet pritet të nisin në ditët e ardhshme, por pa bërë specifikime. /tesheshi.com/
