Nga Mensur Krasniqi
Nuk kanë të ndalur komentet dhe kritikat në adresë të kryetarit të shtetit të Maqedonisë pas vendimit të tij për të amnistuar politikanët më të lartë të partive maqedonase VMRO-DPMNE dhe LSDM. Deri tani Ivanov ka amnistuar nga veprat penale ish shefin e policisë sekrete, Sasho Mijallkov, ish ministren Gordana Jankullovska, Kryetarin e LSDM-së, Zoran Zaev dhe ish ministrin e Brendshëm në vitin 2001, Ljube Boshkovski. Ivanov në një konferencë për shtyp ka informuar se do të lirojë nga përgjegjësia penale të gjithë të përfshirët në përgjimet e bombave që kishte publikuar opozita maqedonase.
Ndaj kësaj, përveç Ambasadës së Shteteve të Bashkuara të Amerikës, kanë reaguar edhe vetë partitë politike maqedonase.
Sipas liderit të LSDM-së, Zoran Zaev, me vendimin e tij Ivanov i ka dhënë grusht shtet Maqedonisë dhe ka rrumbullakosur një proces të filluar nga Nikolla Grievski dhe bashkëpunëtorët e tij.
“Ivanov sot u bë bashkëpjesëmarrës në krimin e familjes. Sot më nuk ka shtet juridik. Sot e varrosën Marrëveshjen e Përzhinos. Ne nuk do ta lejojmë këtë. Nga sot me qytetarët do ta mbrojmë Maqedoninë. Kërkojmë që Ivanov të japë dorëheqje. Në emër të opinionit, proceset patjetër duhet të vazhdojnë. Kriminelët do të të duhet të dënohen. Të pafajshmit duhet të lirohen. Ose Gruevski ose Maqedonia”, ka deklaruar lideri i LSDM-së, Zoran Zaev, duke bërë thirrje qytetarëve që të dalin në protesta dhe të mbrojnë shtetin nga kjo qeveri.
Zaev madje tha se as kërkon dhe as që do të pranonte amnistinë e kryetarit Ivanov, meqë ndjehet i pastër nga çfarëdo përgjegjësie penale.
Ajo që habit është reagimi i VMRO-DPMNE-së, ku sipas tyre është i papranueshëm vendimi i Ivanov për të amnistuar ata që shkaktuan krizën politike në Maqedoni, edhe atë nëpërmjet montimeve të përgjimeve.
“Ata që e shkaktuan krizën politike nëpërmjet intrigave, skenarëve, sjelljes destruktive, e cila është në kundërshtim me interesin e popullit, do të duhet të përgjigjen. Qëndrimi i VMRO-DPMNE-së, është që njerëzit që kanë mbajtur peng Maqedoninë për një vit e gjysmë, që kanë thyer ligjet dhe institucionet e shtetit, patjetër duhet të përgjigjen”, thuhet në reagimin e VMRO-DPMNE-së.
Sipas profesorit të shkencave penale, Afrim Osmani vendimi i Ivanovit për amnisti të të gjithë politikanëve të inkriminuar, duke mos përjashtuar këtu edhe ish ministrin e Punëve të Brendshme, Ljube Boshkovskin, i cili në luftën e vitit 2001 kreu masakrën e paparë ndaj shqiptarëve në Luboten të Shkupit, është skandal i radhës në Maqedoni. Profesori Osmani është kategorik se nëse falen politikanët të cilët kanë bërë vepra penale, atëherë pse mos të falen shqiptarët e burgosur të rastit “SOPOT”, “MONSTRA” dhe të tjerë.
“Ashtu edhe siç pritej, pasi që gjykata kushtetuese ia zgjidhi duart kryetarit të shtetit që ti falë të gjithë personat-politikanë që dyshohen për krim të organizuar, keqpërdorime të detyrës zyrtare, për veprat që kanë të bëjnë me zgjedhjet, pedofilat etj. Abolicion për të gjithë politikanët ndaj të cilëve u inicuan procedura penale nga ana e Prokurorisë Themelore si dhe një falje për një politikan që është duke e vuajtur dënimin- brat Lube. Atëherë pse kryetari mos ti falë personat e dyshuar për rastin MONSTRA, për rastin e Kumanovës, Sopotit etj. Sipas këtij vendimi të kryetarit të shtetit s’ka pse ekziston më prokuroria speciale”, ka deklaruar profesori universitar Afrim Osmani. /tesheshi.com/
