Në botë ekziston një ashtuquajtur “klub elite”, ku bëjnë pjesë rreth 28 miliarderë në botë, që i kanë siguruar vetë të ardhurat e jo të trashëguara, të cilët janë ende mes të 20-ave dhe të 30-ave. Shumica e tyre, konkretisht 21, i kanë siguruar të ardhurat prej teknologjisë, ndërsa 15 prej tyre sapo janë futur edhe në listën e 100 më të pasurve të teknologjisë.
Më i riu mes të këtyre të 100-tëve, e njëkohësisht edhe miliarderi më i ri në botë, është 25-vjeçari bashkëthemelues i Snapchat, Evan Spiegel, i cili krijoi aplikacionin me foto që zhduken kur ishte ende student në Stanford. E sigurisht, të qenit kaq shumë i pasur dhe me famë, e ka ndihmuar atë të ketë një lidhje me modelen dhe aktoren Miranda Kerr.
Ndërsa bashkëthemeluesi i Facebook, Mark Zuckerberg, është më i pasuri ndër të rinjtë. 31-vjeçari, i cili sapo ka njoftuar se do të bëhet edhe baba, ka një pasuri prej 41 miliardë dollarësh, ndërkohë që 14 teknologët e tjerë nën të 40-ave kanë së bashku një pasuri prej 59 miliardë dollarësh.
Zuckerberg ishte vetëm 2 vite më i ri sesa Spiegel aktualisht, kur arriti shifrën e 1 miliardëshit në moshën 23-vjeçare. Ai gjithashtu të kujton fillimet e numrit 1 të teknologjisë në botë, Bill Gates, pasi ashtu si themeluesi i Microsoftit, edhe Zuckerberg është larguar nga Harvardi për të hedhur hapat e parë të zhvillimeve teknologjike dhe historisë që e ndoqi më pas./tesheshi.com/
