Centristi që bëhet gati për balotazhin e së dielës në zgjedhjet presidenciale në Francë ka bërë të ditur se përpara janë dy alternativa: ose do të ketë një reformim të Bashkimit Europian, ose mundësia e një Frexit-i, diçka e ngjashme me Brexit-in, nuk do të jetë më e largët.
Emmanuel Macron, qasja e të cilit është krejt e kundërt me atë të rivales së tij, Marine Le Pen, ka folur për rrjetin informativ britanik BBC, ku ka parashtruar idetë e tij mbi një reformë të BE-së si e vetmja mundësi për të shmangur këtë herë një Frexit.
“Unë jam proeuropian, i kam mbrojtur vazhdimisht gjatë këtyre zgjedhjeve idenë europiane dhe politikat europiane, sepse besoj se është tejet e rëndësishme për popullin francez dhe për vendin e vendit tonë në globalizimin. Por në të njëjtën kohë duhet të përballemi me situatën, të dëgjojmë njerëzit tanë, t’i vëmë veshin faktit se ata janë sot shumë të zemëruar, të paduruar, e se disfunksioni i BE-së nuk është më i përballueshëm,” ka thënë njeriu që anketimet e nxjerrin fitues të dielën që vjen.
“Prandaj mendoj se mandati im, dita më pas, do të jenë në të njëjtën kohë për të reformuar thellësisht Bashkimin Europian dhe projektin tonë europian.”
“Tradhti” e ka quajtur ai lënien e BE-së që të funksionojë si tani.
“Dhe unë nuk dua të veproj kështu,” është shprehur Macron. Duke paralajmëruar: “Sepse ditën tjetër do të kemi një Frexit, apo do të kemi përsëri Frontin Nacional.” /tesheshi.com/
