Anketimet më të fundit për zgjedhjet e ardhshme në Francë për presidentin e vendit kanë nxjerrë për herë të parë si kryesues në raundin e parë të tyre centristin Emmanuel Macron.
Ish-ministri i Ekonomisë, i parë tani si kandidati më i mundshëm për t’i fituar zgjedhjet presidenciale, pretendohet të marrë 26 për qind të votave në raundin e parë të votimit më 23 prill, përkundër 25 përqindëve të udhëheqëses së Frontit Nacional, Marine Le Pen.
Anketimi i kryer më së fundi nga Harris Interactive e nxjerr Macron-in fitues në balotazhin e 7 majit, me 65 për qind të votave; shumë më tepër se Marine Le Pen, që mendohet të mbledhë vetëm 35 për qind të tyre.
Një shtysë për fushatën e Macron-it erdhi një ditë më parë nga ish-kryebashkiaku socialist i Parisit, Bertrand Delanoe, që i dha mbështetje publike dhe e quajti kandidatin centrist “një reformist dhe realist”.
Macron i deklaroi AFP-së të martën se do të mbronte klasën e mesme franceze, të shpërfillur nga e majta dhe e djathta.
Pozitat e tij janë forcuar dhe pas skandaleve të njëpasnjëshme të shpërthyera rreth figurës së një tjetër kandidati, konservatorit Francois Fillon.
Zgjedhjet presidenciale në Francë po priten me shumë interes, pasi përbëjnë një moment kyç për vetë të ardhmen e BE-së. /tesheshi.com/
