Njeriu i parashikuar të jetë fituesi i raundit të dytë të zgjedhjeve presidenciale në Francë është goditur nga pirateria elektronike, një fenomen i përsëritur tanimë në fushatat zgjedhore.
Një numër i madh e-mail-esh që kanë të bëjnë me fushatën elektorale të Emmanuel Macron-it janë publikuar online në internet një ditë më parë, pak para votimeve të së dielës.
Lëvizja politike e Macron-it, En Marche!, e pohoi faktin se kishte rënë pre e një sulmi të piraterisë elektronike, me një numër të madh dokumentesh të publikuara nga një përdorues i quajtur EMLEAKS.
Sipas ekipit të fushatës të kandidatit centrist, dosje të vërteta qenë përzier me dosje të rreme për të sjellë pështjellim te njerëzit.
Në këndvështrimin e ekipit të fushatës së Macron-it, qëllimi ishte i qartë: t’i viheshin shkopinj nën rrota kandidatit pretendent për fitimin e zgjedhjeve të 7 majit.
Bëhet fjalë për materiale të postës elektronike dhe të dhëna financiare, të rrëmbyera me një akt piratesk në rrjetin elektronik.
Anketimet më të fundit e nxjerrin Macron-in të kryesojë me 20 për qind karshi ekstremistes Marine Le Pen. /tesheshi.com/
