Emiri i Katarit tha se ishte i habitur nga vonesa në dërgimin e ndihmave për viktimat e tërmetit të muajit të kaluar në Siri, duke shtuar se ishte e gabuar të keqpërdoret ndihma humanitare për qëllime politike.
Katari ishte në mesin e disa shteteve rajonale që mbështeti rebelët në luftën civile të Sirisë, e cila është ndezur që nga viti 2011, dhe më parë ka folur kundër përpjekjeve të disa vendeve për të normalizuar lidhjet me Damaskun.
Duke folur në hapjen e një konference të Kombeve të Bashkuara për vendet më pak të zhvilluara në Doha, kryeqyteti i Katarit, të dielën, Sheikh Tamim bin Hamad al-Thani theksoi nevojën për të ndihmuar sirianët “pa hezitim” dhe për të mbështetur përpjekjet e Turqisë për t’u rikuperuar nga shkatërrimi sizmik.
“Takimi ynë po zhvillohet ndërkohë që vëllezërit tanë në Turqi dhe Siri po vuajnë ende nga efektet e tërmetit të fuqishëm që i goditi dhe preku miliona njerëz”, tha Al-Thani.
“Theksoj domosdoshmërinë e shtrirjes së dorës së ndihmës pa hezitim ndaj popullit vëllazëror sirian. Shfrytëzimi i një tragjedie njerëzore për qëllime politike është i papranueshëm. Nuk ka asnjë mënyrë që të ndërtojmë një botë të re, më të sigurt, më të drejtë dhe më të lirë për sot dhe nesër, përveçse nëpërmjet solidaritetit njerëzor ndërkombëtar.”
Më shumë se 45,000 njerëz kanë vdekur në Turqi, ndërsa rreth 6,000 vdekje janë raportuar në Siri, ku rajoni veriperëndimor, i kontrolluar nga rebelët në luftë me regjimin e presidentit Bashar al-Assad, është goditur më keq.
Kombet e Bashkuara kanë bërë thirrje për qasje në të gjitha palët në Siri, tashmë të shkatërruar nga vitet e luftës civile, për të rritur dërgesat e ndihmave.
Organet e ndihmës ankohen për kufizime nga qeveria në Damask, e cila sipas tyre po politizon shpërndarjen e ndihmave.
Agjencitë e tjera të ndihmës thonë se rebelët kanë bllokuar ndihmën nga pjesët e kontrolluara nga qeveria të Sirisë, duke komplikuar më tej përpjekjet.
Pothuajse 530,000 njerëz u evakuuan nga zona e fatkeqësisë vetëm në Turqi.
Qeveria në Ankara tha se 173,000 ndërtesa janë shembur ose janë dëmtuar rëndë deri më tani, ndërsa më shumë se 1.9 milionë njerëz janë strehuar në strehimore të përkohshme ose hotele dhe objekte publike.
OKB vlerëson se 8.8 milionë njerëz janë prekur në Siri.
Muajin e kaluar, 22 vdekje u raportuan nga një shpërthim kolere në Sirinë veriperëndimore pasi tërmeti goditi rajonin, thanë shërbimet e urgjencës në zonën e kontrolluar nga opozita.
“Shkatërrimi i infrastrukturës, sistemeve të furnizimit me ujë dhe kanalizimeve pas tërmetit rrit mundësinë e shpërthimit të sëmundjeve”, njoftoi në Twitter Mbrojtja Civile Siriane, e njohur edhe si “Helmetat e Bardha”. /tesheshi.com/
