Edhe pse mund të qëndrojnë në Jemen për “operacione kundër terrorizmit”, Emiratet e Bashkuara Arabe kanë njoftuar për mbarimin e misionit të trupave të tyre në luftën e Jemenit.
Princi i kurorës i Abu Dabit, e njëkohësisht komandanti suprem i forcave të armatosura të Emirateve të Bashkuara Arabe, Muhammed bin Zejid el-Nahjani, e ka bërë të njohur këtë në faqen e tij zyrtare në Twitter, ku thotë se lufta ka mbaruar për trupat e Emirateve.
Ndërkohë që zëdhënësi i koalicionit arab që lufton në Jemen nuk ka pranuar të reagojë ndaj njoftimit të mësipërm, mbetet mundësia që trupat e Emirateve të qëndrojnë edhe më tej në Jemen.
Emiratet e Bashkuara Arabe kanë qenë mes anëtarëve më aktivë të koalicionit arab që ndërhyri më tepër se një vit më parë në Jemen për t’u ardhur në ndihmë forcave besnike të presidentit Abdurabbu Mansur Hadit.
Zyrtarë jemenas të sigurisë kanë deklaruar se trupat e Emirateve ishin ende në Aden të mërkurën, duke mbrojtur aeroportin dhe pallatin presidencial.
Një analist ushtarak do t’i thoshte Al Jazeera-s nga Dubai se përjashtohej mundësia e një debati mes dy vendeve kyç të koalicionit, Arabisë Saudite dhe Emirateve të Bashkuara Arabe, në lidhje me këtë çështje.
Koalicioni arab ka luftuar ndaj husinjve, rebelëve shiitë që mbështeten nga Irani dhe kanë nën kontroll ende pjesë të veriut të Jemenit, si edhe të kryeqytetit, Sana. /tesheshi.com/
