Emiratet e Bashkuara Arabe kanë ftuar ambasadorin izraelit në Abu Dhabi në Ministrinë e Punëve të Jashtme për shkak të bastisjeve në xhaminë Al-Aksa, raporton agjencia Anatolia.
Në një deklaratë të Ministrisë së Punëve të Jashtme të Emirateve thuhet se Reem Ebrahim Al-Hashimi, Ministri i Shtetit për Bashkëpunim Ndërkombëtar, ka ftuar në Ministrinë e Punëve të Jashtme Amir Hayek, ambasadorin izraelit në Abu Dhabi.
Al-Hashimi kujtoi sulmet dhe dhunën kundër civilëve dhe vendeve të shenjta në Al-Quds dhe Al-Aksa, duke vënë në dukje se Emiratet dënojnë me forcë sulme të tilla dhe shkelje të të drejtave.
Theksohet se autoritetet izraelite duhet të respektojnë të drejtat e palestinezëve për t’u lutur dhe menjëherë të ndalojnë cenimin e dinjitetit të Al-Aksa-s.
“Është e nevojshme të sigurohet një mjedis që do të mundësojë një paqe të drejtë dhe gjithëpërfshirëse dhe kthimin në negociata për një shtet të pavarur palestinez me Al-Kudsin lindor si kryeqytet brenda kufijve të vitit 1967,” tha Al-Hashimi.
Tensionet në territoret palestineze janë rritur që kur forcat izraelite bastisën kompleksin e Xhamisë Al-Aksa të premten, duke plagosur qindra besimtarë.
Qindra kolonë hebrenj po hyjnë në kompleksin Al-Aksa nën mbrojtjen e fortë të policisë këto ditë për të festuar Pashkën, e cila filloi të premten. Policia izraelite është vendosur rreth qytetit të vjetër dhe Al-Aksa.
Për myslimanët, Al-Aksa është faltorja e tretë më e rëndësishme, ndërsa hebrenjtë pretendojnë se aty dikur kishte dy tempuj të tyre.
Kompleksi Al-Aksa, i cili mbulon 15 për qind të bërthamës së vjetër të Al-Quds, është nën pushtimin izraelit dhe është pika e takimit të tre feve më të mëdha në botë.
Reagimi i Emirateve vjen në një kohë që ky vend pos që ka njohur Izraelin, po vendos dhe marrëdhënie të ngushta me shtetin hebre, duke provokuar dhe një lloj zemërate në botën islame. /tesheshi.com/
