Nga Shkëlzen Rrecaj
Emin Grajqevci, atlet nga Komuna e Lipjanit e që është pjesë e klubit Fushë Kosova nga kjo komunë, është një premtues i madh për t’i sjell Kosovës medalje. Grajqevci është fitues i shumë garave dhe shumë medaljeve, të organizuar nga Federata Atletike e Kosovës. Ai në një intervistë të shkurtër për portalin tesheshi.com ka treguar për të arriturat e tij, si dhe për të ardhmen që e pret në garat e atletikës…
Si ju lindi pasioni për mbretëreshën e sporteve?
Pasioni për mbretëreshën e sporteve ishte që nga klasa e VI e shkollës fillore ku në kroset që organizoheshin nga shkolla dola fitues.
Kur dhe ku i morët hapat e parë?
Për herë të par kam marrë pjesë në gjysmëmaratonën e Prishtinës në disiplinën 5 km në vitin 2013.
Për cilin klub garoni dhe na tregoni si është i organizuar klubi i juaj?
Garoj në klubin atletik Fushë Kosova në Fushë Kosovë, është klub që ka një organizim të mirë dhe është klub që gjithmonë ka pasur atlet me rezultate të mira.
Grajqevci, ju keni marrë pjesë në shumë gara të Atletikës dhe tashmë keni rrëmbyer disa vende. A mund të na tregoni të arriturat tuaja në ketë disiplinë?
Po është vërtet, unë garoj në disiplina të gjata dhe këtë vit kam marrë pjesë në çdo organizim nga federata dhe jam i kënaqur me të arriturat, ku në çdo garë jam stolisur me medalje, jam shpallur kampion 7 herë këtë vit në vrapimet e rrugëve, 6km, 10km, 13 km..
Përveç garave që janë mbajtur në Kosovë, a keni marrë pjesë edhe në gara ndërkombëtare?
Unë kam marrë pjesë në garat jashtë vendit në Shqipëri dhe Mal të Zi, ku në Shqipëri jam shpallur tri herë nënkampion në disiplinat 5 km, 10 km, 12 km, kurse në Mal të Zi jam shpallur kampion në disiplinat 10 km, 21 km në maratonën e Podgoricës.
Ku i mbani ushtrimet dhe a keni kushte për mbajtjen e tyre?
Stërvitjet i mbaj vet, shkaku që nuk mundem me iu bashkëngjit klubit për arsye se klubi është në komunën tjetër, e për shkak të largësisë unë stërvitem vetëm rreth maleve të Blinajës “Lipovicës”, kushtet natyrore janë por fatkeqësisht mungojnë ato materiale.
Çfarë i duhet një sportisti që të arrijë suksese përpos kushteve materiale, kuptohet?
Për të arritur suksese duhet vullnet përkushtim, pastaj vjen plani stërvitor dhe ushqimi më orar dhe kryesisht bio natyror, jo ushqim i konservuar.
Sa keni mbështetje nga komuna e juaj, ajo e Lipjanit konkretisht ju si atlet?
Deri me sot nga askush nuk kam pasur përkrahje, as nga komuna prej nga vij, thjesht duhet të investosh vet me shpresë që do të vinë ditë më të mira.
Cilat gara të presin në të ardhmen dhe cilat janë ëndrrat e juaja si atletë?
Këtë vit më pret maratona 42km195m për nder të Pavarësisë së Shqipërisë më 28 nëntor. Endrra ime është të sjell sa me shumë trofe dhe rekordin në 21 km në Prishtinë. /tesheshi.com/
