Tentativat e emigrantëve për të kaluar nga Franca në Britaninë e Madhe përmes Eurtunelit janë bërë të përnatshme, thanë autoritetet, duke shtuar se udhëtimet po anulohen përditë e më shumë pasi policia kryen operacione për të larguar emigrantët.
Mendohet se tashmë rreth 5 mijë emigrantë ndodhen në pikën nisëse nga Franca të Eurotunelit, në Kale.
Grupi që operon hekurudhën tha se aktiviteti me emigrantët është i mirëorganizuar dhe i planifikuar, dhe njerëzit janë aq të dëshpëruar të arrijnë në Britani sa janë të përgatitur të hidhen në trena që udhëtojnë me shpejtësi të lartë.
Sipas drejtorit për marrëdhënie Publike të kompanisë, John Keefe, me qindra njerëz largohen nga perimetri i terminalit përnatë. “Ndeshemi me trafikantë që punojnë së bashku për të krijuar hutim tek personeli I sigurisë. Eshtë trafik i mirëorganizuar”, tha ai.
Trafikantët shfrytëzojnë njerëzit që qëndrojnë në Kale me dëshirën e tyre e që qëllim të vetëm kanë të shkojnë në Britani. Numri i atyre që tentojnë të kalojnë përmes tunelit shkon nga 50 në 100 në ditë.
Kjo rritje nuk vjen si surprizë për shkak të numrit të madh të emigrantëve që mbërrijnë në brigjet e Europës përmes Mesdheut dhe që është shndërruar tashmë në një problem europian që nuk po gjen zgjidhje. /tesheshi/
