Kryeministri Rama ka hapur një “front lufte” me Londrën zyrtare, ku nuk fsheh as brengën Brexit – daljen e Britanisë së Madhe nga BE – duke mbrojtur emigracionin shqiptar ndaj sulmeve të fundit të ministres së Brendshme Suella Braverman.
Kjo e fundit ka kriminalizuar me akuza prurjet shqiptare nga La Manche, duke bërë thirrje dhe për politika dëbimi.
Më saktë, Ministrja Braverman tha disa ditë më parë se Anglia jugore po përballej me një pushtim emigrantësh dhe mes të tjerash akuzoi shqiptarët se po abuzojnë me ligjet moderne të skllavërisë.
Por për Ramën, kjo nuk është vëçse ksenofobi. “Nuk bëhet fjalë për një person. Ka të bëjë me klimën që është krijuar dhe ka të bëjë me gjetjen e ‘kockave të kurbanit’ dhe fajësimin e të tjerëve. Nuk bëhet fjalë për shqiptarët, as alienët apo gangsterët, por ka të bëjë me politikat e dështuara për kufijtë dhe krimin.
Kjo lloj gjuhe nuk është një politikë, nuk është një program, nuk është një vizion. Nuk është gjë tjetër veçse nxitja e ksenofobisë dhe synimi, veçimi i një komuniteti.
Unë admiroj gjithçka që përfaqëson Britania. Por me të vërtetë jam i neveritur për këtë lloj politike që në fund është e dënuar të dështojë”, tha Rama në një prononcim për BBC.
Më pas, ai veçoi Brojën si një shqiptar të shquar më ishull.
“Krenar për ty Armando Broja dhe krenar për çdo shqiptar që punon shumë dhe kontribuon në MB!
Turp për këdo që veçon komunitetin tonë të madh atje, duke ju kthyer të gjithëve në shënjestër të diçkaje që shqiptarët as e kanë krijuar dhe as nuk mbajnë përgjegjësi për sa keq po trajtohen”, shkruan i pari i qeverisë shqiptare.
Për Ramën, Britania e Madhe ka dështuar në politikat e kufirit, gjë që kërkon ta transferojë te shqiptrët. /tesheshi.com/
