Nga Gjergji Koja
Wess Mitchell dhe Jonathan Moore janë emëruar në postet e zv.ndihmës-Sekretarit amerikan të Shtetit, duke zëvendësuar në këto detyra, Victoria Nuland dhe Hoyt Brian Yee.
Dy zyrtarët e lartë të administratës amerikane janë të njohur për politikën dhe opinionin në Shqipëri, për shkak të angazhimeve të tyre në situatat e krizave politike. Nuland vizitoi disa herë Shqipërinë përgjatë 2015-2016 në përpjekje për të bindur pozitën dhe opozitën shqiptare për miratimin e reformës në drejtësi.
Ndërsa Hyot Brian Yee u investua fuqimisht në zgjidhjen e krizës së fundit politike në vend, duke detyruar Ramën dhe Bashën të uleshin ë tryezën e dialogut dhe të miratonin marrëveshjen e 18 majit.
Nuland ishte ndër të parat zyrtare që u largua nga administrata Trump, ndërsa Yee vijoi detyrën e zv.ndihmës-sekretarit deri pak javë më parë, kur morri emmërimin e ri, atë të Ambasadorit të SHBA në Greqi.
Por edhe Jonathan Moore ka një njohje të mirë mbi politikën shqiptare, si dhe për rajonin. Moore u angazhua për uljen e tensioneve politike pak përpara zgjedhjeve parlamentare të 2013-ës në Shqipëri, madje vetëm dy muaj para zgjedhjeve zhvilloi një vizitë në Tiranë.
Moore shpeshherë ka folur për luftën ndaj korrupsionit dhe krimit në Shqipëri duke përcjellë mesazhe të qarta për politikën shqiptare. Gjithashtu ai ka shërbyer si ambassador i SHBA në Bosnje, çka do të thotë se ka një eksperiencë të mirë mbi zhvillimet në rajonin e Ballkanit.
Një ditë më parë, ambasadori amerikan në Tiranë, Donald Lu, mandati 3-vjeçar i të cilit përfundon në nëntor, foli qartë dhe prerë në një takim me të rinjtë. Ai tha se nëse qeverisë i kërkon një gjë dhe ajo nuk të përgjigjet, atëherë rrëzohet. Lu më konkretisht foli për shpërndarjen falas të librave për nxënësit shqiptarë, madje duke theksuar se nëse nuk ka fonde në këtë drejtim, atëherë nga dalin paratë për zyrat dhe makinat luksoze të zyrtarëve.
Gjatë muajve të fundit vëmendja amerikane në Ballkan është shtuar për shkak të atij që quhet rreziku i influencës ruse. Kjo ishte një nga arsyet që senatorë dhe kongresmenë amerikanë, por edhe Hyot Brian Yee gjatë muajit maj dhe qershor ndërmorrën ture në të gjitha vendet e rajonit duke shprehur qartazi mbështetjen e SHBA ndaj tyre. /tesheshi.com/
