Mazhoranca dhe opozita janë përfshirë në një debat të ashpër në Kuvendin e Maqedonisë në lidhje me emërimin e kryeprokurorit të ri.
VMRO-DPMNE insiston se në këtë periudhë nuk ka mundësi as për shkarkime e as për emërime dhe kërkon që konkursi për kryeprokuror të hiqet nga rendi i ditës.
Por shumica parlamentare insiston se një gjë e tillë është e patjetërsueshme për të nisur reformat në gjyqësor.
Dafina Stojanovska nga VMRO-DPMNE pyeti mazhorancën se kujt po i tregon superioritet dhe nëse me këtë gjest po tenton të fitojë më shumë vota në zgjedhje?!
“Ju doni të emëroni kryeprokuror të ri, ishit kundër regjimit ndërsa tani ju jeni vetë regjimi. A mendoni se kryeprokurori i ri do t´iu ndihmojë gjatë fushatës? Anuloni këtë pikë deri pas zgjedhjeve lokale”, deklaroi Dafina Stojanovska, deputete e VMRO-së.
Gjithashtu Krsto Jovanovski nga VMRO vlerëson se po thyhet ligjshmëria dhe kushtetueshmëria. Sipas tij në vend që kryetari i Kuvendit, Talat Xhaferi, të heq këtë pikë nga rendi i ditë, ai gjen kohë të kritikojë për gjoja fjalimet e shumta.
“Duan ta mbrojnë kriminelin që në këtë rast quhet kryeministër. Ky konkurs për kryeprokuror është tirani. Dëshironi të frikësoni qytetarët duke treguar forcë”, tha Krsto Jovanovski, VMRO DPMNE.
Nga ana tjetër Zhaklina Llazarevska nga LSDM i pyeti deputetët e opozitës nëse po tentojnë të pengojnë fillimin e funksionimit të drejtësisë.
“Duket frika juaj kur të fillojë të funksionojë drejtësia”, tha Zhaklina Llazarevska, LSDM.
Një debat i ngjashëm si ky është zhvilluar edhe gjatë shkarkimit të ish kryeprokurorit Marko Zvërlevski. /tesheshi.com/
