Sekretari i përgjithshëm i OKB-së, Antonio Guterres, e kishte njoftuar Këshillin e Sigurimit gjatë kësaj jave mbi planet për ta vendosur ish-kryeministrin palestinez, Salam Fayyad, në krye të misionit të organizatës botërore në Libi, në përpjekje për të ndërmjetësuar në bisedimet për një marrëveshje politike në atë vend.
Një emërim që nuk është pritur mirë nga SHBA-ja, që e ka bllokuar dërgimin e ish-kryeministrit palestinez si të dërguar të OKB-së në Libi.
Ambasadorja amerikane në OKB, Nikki Haley, tha përmes një deklarate se nuk e mbështeste këtë emërim.
“OKB-ja ka qenë e prirur padrejtësisht për shumë kohë në favor të Autoritetit Palestinez në dëm të aleatëve tanë në Izrael,” është shprehur ajo.
“SHBA-ja do të veprojë, jo vetëm do të flasë, në mbështetje të aleatëve tanë,” ka nënvizuar Nikki Haley, duke e bërë të qartë se kundërshtia ka të bëjë me qasjen e vendit të saj.
Salam Fayyad ka qenë kryeministër i Autoritetit Palestinez në vitet 2007-2013, e dy herë ka mbajtur dhe postin e ministrit të Financave. Ai qe menduar të zëvendësonte gjermanin Martin Kobler, në detyrë si i dërguari në Libi që nga nëntori i 2015-s.
Presidenti Trump dhe ambasadorja Haley e kanë kritikuar miratimin e një rezolute në dhjetor nga OKB-ja që kërkonte prej Izraelit t’i jepte fund ndërtimit të ngulimeve në territoret palestineze. /tesheshi.com/
