Presidenti i sapozgjedhur Donald Trump njoftoi të shtunën se ish-ambasadori në Gjermani dhe besnik i lartë i tij, njëherësh dhe ish-i dërguar për Ballkanin, Richard Grenell, njeriu që rrëzoi qeverinë e parë të Albin Kurtit, do të shërbejë si i dërguari special i presidentit, duke i dhënë fund spekulimeve javësh për rolin e “aleatit bombë” në administratën e dytë të “Trump”.
Në një postim për Truth Social, Trump tha se ish-drejtori i tij në detyrë i inteligjencës kombëtare dhe i dërguari special për dialogun midis Serbisë dhe Kosovës “do të punojë në disa nga pikat më të nxehta në botë, duke përfshirë Venezuelën dhe Korenë e Veriut”.
Duke pasur parasysh fokusin e dukshëm në pikat e nxehta globale, është e mundur që puna e Grenell mund të përfshijë Iranin, Sirinë, Jemenin, Sudanin, Haitin ose ndonjë numër krizash të tjera.
Njoftimi zgjidh misterin se çfarë roli do të merrte Grenell në administratën e dytë të Trump-it, pasi emri i tij mungonte dukshëm në një mori emeërimesh të administratës dhe kabinetit në pritje. Grenell bëri presion për emërimin e tij si Sekretar Shteti, por humbi ndaj Senatorit nga Florida, Marco Rubio, duke frustruar zërat e politikës së jashtme me prirje të djathtë. Ai gjithashtu hodhi poshtë rolin e drejtorit të Inteligjencës Kombëtare.
Spekulimet më pas u kthyen nëse Grenell do të emërohej i dërguari special për Iranin ose krizën Rusi-Ukrainë ose do të merrte një post ambasadori të profilit të lartë.
Ditët e fundit, Trump ka sinjalizuar se besniku do të përfundojë në një pozicion të rëndësishëm. Trump njoftoi sa vijon në Truth Social të mërkurën mbrëma: “Richard Grenell është një person i jashtëzakonshëm, një yll. Ai do të jetë diku, lart!”
Pozicioni i Grenell-it mund ta vërë atë në kundërshtim me Rubion dhe ishte e paqartë nga njoftimi se si roli i tij do të ndërvepronte me Departamentin e Shtetit.
Në shtator, Grenell mori pjesë në takimin privat të Trump-it me presidentin ukrainas Volodymyr Zelensky në Trump Tower në Manhattan, raportoi Reuters. Ai publikisht mbrojti fundin e luftës së Rusisë me Ukrainën në kushte që qeveria e Kievit i konsideron të papranueshme.
Diplomacia e dështuar dhe biznesi i suksesshëm në Ballkan
Në shtator 2020, Rick Grenell ishte shumë aktiv ndërkombëtarisht. Ai hartoi një plan, si i dërguar i posaçëm për bisedimet ndërmjet Prishtinës dhe Beogradit, për bashkëpunimin ekonomik ndërmjet Kosovës dhe Serbisë, i cili rezultoi me një marrëveshje të nënshkruar veçmas në Shtëpinë e Bardhë nga presidenti i Serbisë, Aleksandar Vuçiç dhe kryeministri i atëhershëm i Kosovës, Avdullah Hoti.
Presidenti Trump më vonë deklaroi se kishte arritur të “ndalonte konfliktin e përgjakshëm të gjatë midis serbëve dhe shqiptarëve”. Asgjë nuk doli nga ajo marrëveshje dhe ajo u harrua shpejt, pasi si duket u realizua në mënyrë që Trump të mund të thoshte se kishte arritur sukses ndërkombëtar përpara zgjedhjeve presidenciale në nëntor të atij viti.
Megjithatë, edhe pasi Joe Biden u bë president amerikan, Grenell mbeti i lidhur me Ballkanin Perëndimor, më konkretisht me Serbinë. Kështu, në tetor 2023ai mori medaljen “Urdhri i flamurit serb”, dhënë nga presidenti Vuçiç, i cili e ka vlerësuar atë si “mik i vërtetë i Serbisë”.
Ajo “miqësi” vazhdoi dhe u kthye në një biznes të madh dhe një investim të madh me vlerë gjysmë miliardë dollarë. Vajza e Trump-it, Ivanka dhe bashkëshorti i saj Jared Kushner kanë investuan paratë për ish-kompleksin e Shtabit të Ushtrisë serbe në qendër të Beogradit, bombarduar nga NATO për shkak të Kosovës, për të kthyer atë në atraksion turistik. E gjitha kjo përmes Grenell-it. Kështu hynë në Serbi paratë e familjes Trump.
Një vit më vonë, Donald Trump fiton zgjedhjet presidenciale në Amerikë dhe Richard Grenell ishte kandidati kryesor për njeriun e parë të Departamentit të Shtetit. Për habinë e shumë njerëzve në Uashington, Trump emëroi Senatorin Rubio në vend të Grenell-it.
Tani e dimë se cili do të jetë fati i tij si një i djathtë radikal dhe besnik i vendosur brenda rrethit të Trump-it. Ne e dimë se ai do të jetë një i dërguar special për misione speciale. Ndoshta një nga ato misione do të lidhet sërish me Ballkanin Perëndimor? Ndoshta?
Ne nuk e dimë këtë, por e dimë që Grenell u pamundësua si Sekretar i mundshëm i Shtetit pikërisht për shkak të Ballkanit Perëndimor, ose më mirë për shkak të lidhjes së tij me Aleksandar Vuçiçin dhe familjen Trump, e cila lidh një marrëveshje prej 500 milionësh. dollarë.
Në minutën e fundit, Trump hoqi dorë nga nominimi i Grenell-it për Sekretar Shteti me nxitjen e disa këshilltarëve të tij, të cilët e bindën se kjo situatë mund t’i sillte telashe dhe se kjo lidhje me Grenellin, Vuçiçin dhe çiftin Kushner mund të vlerësohej si konflikt interesi dhe nepotizmin. E cila është në të vërtetë. Trump nuk donte ta tërhiqte vajzën e tij në një histori më të thellë, veçanërisht pasi Komisioni i Financave të Senatit udhëhoqi një hetim për punët e Grenell-it dhe Kushner-it në Serbi dhe Shqipëri.
Sido që të jetë, Trump po emëron Richard Grenell-in si të dërguarin special, duke thënë: “Rick do të vazhdojë të luftojë për paqen përmes forcës dhe gjithmonë do ta vendosë Amerikën në vend të parë”. /tesheshi.com/
