Kandidati demokrat për president Joe Biden ka thënë se votuesit nuk do të tolerojnë “abuzimin me pushtetin” nëse Presidenti Trump dhe republikanët caktojnë gjyqtaren konservatore Amy Coney Barrett në Gjykatën e Lartë të SHBA përpara zgjedhjeve të 3 nëntorit.
Republikanët po njoftojnë se ata do të konfirmojnë shpejt Barret në atë organ, në të cilin ata kanë një shumicë, dhe demokratët pranojnë se nuk kanë shumë shpresë se do të jenë në gjendje të ndalojnë emërimin, por që ata duan që presidenti dhe republikanët të paguajnë çmimin në votime.
Sondazhet tregojnë se shumica e votuesve duan që një gjyqtar i ri të emërohet nga presidenti i ardhshëm, raporton DPA.
Biden dhe mbështetësit e tij po paralajmërojnë gjithnjë e më shumë se Gjykata e Lartë mund të rrezikojë qasjen në kujdesin shëndetësor për miliona amerikanë me emërimin e tretë të Trump.
“Nuk ka asnjë mister për atë që po ndodh këtu,” tha Biden në një fjalim në shtetin e Delaware.
Nëse emërimi i Barrett në Gjykatën e Lartë forcon më tej shumicën konservatore, republikanët do të “shfrytëzojnë mundësinë për të shfuqizuar Aktin e Kujdesit të Përballueshëm (ACA)”, tha Biden, duke iu referuar një ligji të prezantuar nga ish-Presidenti Barack Obama në 2010 që ul numrin amerikanet e pasiguruar.
Trump ka rishpallur mundësinë që Gjykata e Lartë e SHBA të shfuqizojë ACA-n, e njohur si Obamacare, duke argumentuar se ka një plan më të mirë të kujdesit shëndetësor.
“Obamacare do të zëvendësohet nga një alternativë shumë më e mirë dhe shumë më e lirë, nëse Gjykata e Lartë e shfuqizon atë . Kjo do të ishte një fitore e madhe për SHBA!”, shkroi ai në profilin e tij në Twitter.
Demokratët përsërisin se nxitimi për të caktuar një zëvendësues për gjyqtaren e shuar liberale Ruth Bader Ginsburg, është hipokrit sepse lideri republikan i Senatit Mitch McConnell, në 2016 nuk donte as të dëgjonte kandidatin e Obamas për gjykatë, Merrick Garland, nëntë muaj para zgjedhjeve.
Demokrati i Senatit Dik Durbin, tha se pakica demokrate në atë organ nuk mund të detyrojë republikanët të mos mbushin vendin bosh në një periudhë kaq të shkurtër para zgjedhjeve.
Votimi tashmë ka filluar në disa shtete.
“Ne mund ta ngadalësojmë atë për disa orë, ndoshta ditë, por nuk mund ta parandalojmë rezultatin”, tha Durbin.
Gjyqtarët emërohen në Gjykatën e Lartë për gjithë jetën, dhe deri në vdekjen e Ginsburg, pesë gjyqtarë konservatorë dhe katër liberalë ndodhen në të.
Trump tashmë ka emëruar dy gjyqtarë konservatorë në mandatin e tij dhe me emërimin e ri, institucioni mund të kthehet më tej në të djathtë dhe të sjellë ndryshime në çështje të tilla si kujdesi shëndetësor dhe aborti. /tesheshi.com/
