Nga Gjergji Koja
Partia Socialiste do të mbledhë në fundjavë Asamblenë Kombëtare, ku pritet të prezantohen zv.ministrat në qeverinë “Rama2”, por edhe disa prej drejtuesve të institucioneve kryesore.
Ndërkohë që pritet të nisë edhe zëvendësimi i drejtuesve të institucioneve që sot drejtohen nga të komanduar apo përfaqësues të partive që gjatë mandatit 2013-2017 ishin në koalicion me socialistët.
Burime qeveritare shprehen se brenda 2017-ës do të bëhet zëvendësimi i të gjithë drejtorëve të përgjithshëm apo drejtuesve të agjensive, të cilët janë në funskione si përfaqësues partiakë.
Rezultati i zgjedhjeve të 25 qershorit i dha mundësinë Partisë Socialiste të qeverisë e vetme, pa pasur nevojën e koalicioneve apo ndarjen e “tepsisë së pushtetit” me parti që deri para disa muajsh ishin në aleancë me PS dhe zotëronin rreth 30-35 % të pozicioneve drejtuese dhe administratës.
Nisur nga ky fakt, kryeministri Rama dhe drejtues të tjerë të PS-së kanë paralajmëruar një reformim të adinistratës publike, përfshi këtu shkrirjen e shumë institucioneve dhe bashkimin e disa të tjerave në një të vetëm.
Tesheshi.com ka mësuar se një nga drejtuesit që pritet të marrë emërimin brenda pak ditësh është Laert Duraj, i renditur i 4-ti në listën e kandidatëve të PS për qarkun e Gjirokastrës.
Burimet shprehen se Duraj do të jetë administratori i përgjithshëm i Postës Shqiptare, pozicion që sot mbahet nga Vangjush Andoni i komanduar në këtë detyrë, pas shkarkimit të Majlind Lazimit.
Ky i fundit ishte përfaqësues i LSI-së dhe u shkarkua nga detyra gjatë fushatës me urdhër të Task Force, me arsyen e shkeljes së ligjit zgjedhor.
Këshilli Mbikqyrës i Postës Shqiptare vendosi shkarkimin e Lazimit dhe komandimin në këtë pozicion të Andonit, i cili për vite me rradhë ka mbajtur pozicione drejtuese në këtë institucion.
Po kush është Laert Duraj
Laert Duraj, në zgjedhjet e fundit parlamentare ishte kandidati i katërt në listën e Partisë Socialiste për qarkun Gjirokastër.
Ndonëse nuk është një person i njohur publikisht në radhët e socialistëve, ai është pjesë e kësaj partie që prej fillimit të viteve ’90. Duraj është një sipërmarrës i suksesshëm, me fokus të veçantë sektorin e arsimit të lartë, kryesisht atë profesional.
Ai ka lindur dhe është rritur në Damës, Tepelenë, në një familje arsimtarësh.
Prej mëse dhjetë vjetësh, fokusi i tij kryesor është arsimi i lartë, kryesisht ai profesional.
Që nga fushata e zgjedhjeve lokale të vitit 1992 deri në fushatën që kulmon në 25 Qershor, ka qenë pjesë e skuadrave zgjedhore të Partisë Socialiste. /tesheshi.com/
