Agjencia Evropiane e Barnave (EMA) ka rekomanduar zgjatjen e kohës së ruajtjes së vaksinës Pfizer / BioNTech në temperaturën normale të frigoriferit nga pesë në 31 ditë, duke lehtësuar kështu sfidat logjistike për zbatimin e vaksinimit, raporton Reuters.
Ky rekomandim vlen vetëm për ampulat e pahapura, shpjegon EMA.
Rregullatori Evropian bëri rekomandimin e tij bazuar në studime shtesë mbi qëndrueshmërinë e vaksinave të paraqitura për vlerësim nga dy kompani partnere.
Miratimi në SHBA
Në shkurt, autoritetet amerikane miratuan ruajtjen dhe transportimin e vaksinave në temperatura standarde frigoriferësh prej dy deri në tetë gradë Celsius për një maksimum prej dy javësh, në vend të minusit 80 deri në minus 60 gradë të zakonshëm.
Bashkimi Evropian ka bërë thirrje për një rritje të ndjeshme në prodhimin e vaksinave në Evropë dhe nënshkroi një kontratë të re për furnizimin e 1.8 miliardë dozave të vaksinave Pfizer / BioNTech pasi arritën në BE shumë më pak vaksina AstraZeneca nga sa pritej. /tesheshi.com/
