Nga Ahmet Zani
Çdo lloj aktiviteti njerëzor ka dhe të pazakontat e veta. Kështu, këto ditë, kur komuniteti i besimtarëve muslimanë në mbarë botën është në mbyllje të muajit të Ramazanit, i cili shoqërohet për 30 ditë rresht nga agjërimi, vjen një rekord nga Shqipëria, nga zona e Fushë- Krujës, më saktë Fushë-Mamurrasi, ku një vajzë 13-vjeçare ka agjëruar çdo ditë, një më një, dhe tashmë është në përfundim të këtij rituali të pastrimit e rigjenerimit shpirtëror e fizik, me anë të privimit nga ushqimi dhe pirja në një pjesë të ditës. Ajo quhet Elsa Goci, dhe për këtë përvojë që po kalon ndihet mjaft e lumtur.
Fillimisht, prindërit e saj nuk kanë qenë dakort që ajo të agjërojë. Duke gjykuar nga mosha e saj, si dhe nga fakti se orët e agjërimit tani në verë janë të gjata, e po ashtu temperaturat e larta, ata nuk kanë dashur që vajza e tyre, ashtu siç me të drejtë e kanë gjykuar, të riskojë në organizmin e saj.
Por këmbëngulja e 13-vjeçares ka qenë aq e madhe, sa prindërit e kanë lënë të lirë në këtë lloj afshi, edhe fëminor, për devocion fetar. Dhe ja, pas një muaji, jo vetëm që Elsa nuk ndihet e drobitur fizikisht nga agjërimi saj njëmujor, por e thotë me plot gojën se nuk është ndjerë kurrë më mirë, deri në një përjetim të rrallë lumturie.
“Ndihem krenare për këtë që bëra e po bëj për Allahun, Zotin tim”, shprehet ajo gjithë ngazëllim.
Eshtë ngritur çdo mëngjes herët për të ngrënë syfyrin, ndërsa prindërit i kanë shërbuar duke i bërë gati ushqimin. Më pas, dita e saj ka vijuar normalisht duke qenë dhe në shkollë.
“I kam kaluar ditët e agjerimit pa as më të voglin shqetësim, nuk kam ndjerë etje apo uri. Dhe tashmë, për çdo vit do të mbaj agjërim”, ka shtuar më tej Elsa e vogël.
Ajo sapo ka përfunduar klasën e 7-të me nota të shkëlqyera. Ka dy vëllezër të vegjël, për të cilët dëshiron që kur të rriten, të agjërojnë dhe ata në shenjë besimi e bindeje ndaj Zotit së bashku me të si motër e madhe.
Gjatë një iftari të shtruar nga komuniteti i muslimanëve në Mamurras, Elsa ishte besimtarja më e vogël, agjëruesja më e veçantë, dhe pa dyshim njeriu-simbol i atij iftari.
Ajo ka dhe një pasion tjetër, veshjet tradicionale, ndërkohë që ëndërron të studiojë për drejtësi kur të rritet.
“Dua që si besimtare, t’u japë drejtësi njerëzve, t`i japë drejtësi shoqërisë”, thotë ajo, me një inteligjencë të pazakontë për moshën. /tesheshi.com/
