Eliminimi i Italisë nga Botërori i Rusisë, jo vetëm që ka tronditur të gjithë shoqërinë dhe politikën italiane, por ka kthyer dhe qëndrimet ksenofobike, buruar nga bindja se një komplot i huaj është shkaku i poshtërimit të axurëve me mbetjen jashtë Botërorit duke qenë katër herë kampion bote.
Lideri i Ligës së Veriut, Matteo Salvini, i ka vënë të huajve fajin e këtij eleminimi.
“Shumë të huaj në skuadër dhe rezultati është ky…Stop invazionit dhe më shumë djem italian në skuadër”, ka shkruar Salvini në Twitter.
Por i menjëhershëm ka qenë reagimi i ish-kryeministrit Matteo Renzi, njëkohësisht lideri i Partisë së mazhorancës PD.
“Ka liderë politikë që janë lëshuar si çakallë në këtë situatë, si Salvini që fajin për eleminimin tonë jua vënë emigrantëve. Kush kupton sadopak nga futbolli e di mirë se argumentet e tij janë qesharakë. Të huajt janë në skuadrat e Anglisë, Gjermanisë Francës dhe Spanjës që kanë ekipe të mëdha. Sa për shembull, ende në mendjet tona është ajo Francë e bukur multietnike që fitoi Kupën e Botës në vitin 1998. Ç’punë ka nacionaliteti këtu. Duhet reflektim i thellë nga federata dhe shoqëria për këtë eleminim shumë të tmerrshëm, por duhet të ndalojmë spekulimet”, tha Renzi. /tesheshi.com/
