Trajneri i Kombëtares së Italisë, Gian Piero Ventura, nga të mërkurën pasdite, është ish-trajner i axurëve. Mbledhja e Federatës Italiane të Futbollit, ka konkluduar me vendimin për të shkarkuar trajnerin.
Vendimin e ka shpallur vetë presidenti i kësaj federate, Carlo Tavechio, i cili ia ka njoftuar edhe vetë Venturës shkarkimin, duke i ngarkuar përgjegjësitë për mungesën në Botërorin “Rusi 2018”.
Por ndërsa opinioni sportdashës në Itali, kërkonte edhe “kokën” e Tavechio-s, kreu i Federatës italiane nuk e ka realizuar aktin e dorëheqjes. Tashmë mbledhja e javës tjetër do të vendosë për atë që do të ndodhë me përfaqësuesen italiane, që ndodhet në momentin më të vështirë të këtij shekulli.
Përveç opsioneve për emrin e trajnerit të ri, Tavechio-s i duhet të peshojë mirë edhe kushtet e secilit, sidomos pasi “u dogj” njëherë me një trajner jo të klasit të parë.
E për të zgjedhur një trajner “revolucionar” që të ndryshojë imazhin “përtokë” të axurrëve, duhet ta bindësh, ta paguash, ta dëgjosh, t’i plotësosh kushtet e ta lësh të lirë në zgjedhje e tij. /tesheshi.com/
