Në takimet hapëse të fushatës kualifikuese europiane për Botërorin e 2018-tës, rezultatin më të thellë e ka shënuar Skocia, që ka fituar 1-5 ndaj modestëve të Maltës.
Gjermania po ashtu nuk e ka patur të vështirë ndaj Norvegjisë në Oslo. Miqtë e kanë zotëruar totalisht lojën, ndërkohë që vendasit nuk kanë arritur asnjëherë të gjuajnë brenda kuadratit të portës.
Müller e ka zhbllokuar rezultatin në minutën e 15-të, duke e bërë gjithçka më të lehtë në vazhdim. Kimmich ka thelluar rezultatin në fund të pjesës së parë, e Müller ka vulosur rezultatin 0-3 në minutën e 60-të me golin e dytë të tij.
Rreth tre muaj më parë, Sllovakia e Anglia barazonin pa gola në Europian, e kështu u duk se do të përfundonte dhe përballja për kualifikueset e Botërorit në tokën sllovake.
Anglia ka qenë me fat kur ka shënuar në minutën e 95-të, duke siguruar një fitore të çmuar, 0-1. Goli është realizuar nga Lallana. Sam Allardyce e nis me një sukses detyrën e tij si trajneri i përfaqësueses së Anglisë.
Katër barazime ka patur mbrëmë në nëntë prej takimeve.
Me rezultatin 2-2 janë mbyllur dy sfida, Kazakistan – Poloni dhe Lituani – Slloveni. Çekia me Irlandën e Veriut janë ndarë me rrjeta të paprekura, ndërkohë që 1-1 janë fiksuar shifrat në përballjen Rumani – Mali i Zi.
Në takimet e tjera, Azerbajxhani ka fituar 0-1 ndaj San Marinos në transfertë, e me të njëjtin rezultat, 1-0, Danimarka ka mposhtur Armeninë. /tesheshi.com/
