Policia e Elbasanit sekuestroi rreth 11 mijë euro nën dyshimin se janë të fallsifikuara. Operacioni i koduar “këmbyesi” çoi në arrestimin e 3 personave dhe bllokimin e sasisë së eurove.
Burime zyrtare bëjnë të ditur se tre të arrestuarit në bashkëpunim me njëri-tjetrin kanë shkëmbyer në një pikë të këmbimit valutor 300 euro, që më vonë u zbulua se ishin fallse.
Policia është vënë në lëvizje duke bërë të mundur ndalimin e një mjeti tip “Peugeot” në afërsi të fshatit Gostimë.
Sipas burimeve, të arrestuarit janë Leone (Luan) Duka, 41 vjeç banues në Tiranë, i dënuar më parë për veprën penale “Falsifikimi i monedhave”, Agron Rrucaj, 23 vjeç banues në Mamurras Laç dhe me banim të përkohshëm në Tiranë, i dënuar më parë për veprën penale “Prodhim e mbajtje të lëndëve narkotike” dhe Nafie Miraka, 19 vjeçe banuese në fshatin Dufshan, Njësia Administrative Pishaj, Gramsh, me banim të përkohshëm në Tiranë.
Hetimet vazhdojë, për kapjen e personave të tjerë të përfshirë në këtë veprimtari kriminale.
Materialet i kaluan Prokurorisë Pranë Gjykatës së Shkallës së Parë Elbasan për veprime të mëtejshme për veprën penale “Falsifikimi i monedhave, i kryer në bashkëpunim”, parashikuar nga neni 183/2 i Kodit Penal./tesheshi.com/
